თბილისის მერიამ სატრანსპორტო კომპანიის ინიციატივით, დამოუკიდებლობის დღისადმი მიძღვნილი საიუბილეო მეტრომანები დაამზადა, რომელზეც დატანილია წარწერა "100 წელი საქართველოს პირველი დემოკრატიული რესპუბლიკის დაარსებიდან". ბარათის წარწერას ფონად აქვს 1991 წლის დამოუკიდებლობის აღდგენის აქტი, რომელიც ხელმოწერილია საქართველოს რესპუბლიკის უზენაესი საბჭოს და მთავრობის წევრების მიერ 9 აპრილს.

როგორც კომპანიაში On.ge-ს განუცხადეს, საიუბილეო სამგზავრო ბარათის შექმნის იდეა იყო, რომ ორივე თარიღთან ყოფილიყო დაკავშირებული. მათივე განმარტებით, აუცილებელი ტექნიკური მოთხოვნა არ ყოფილა, რომ დიზაინში ორივე მოვლენა ყოფილიყო გაერთიანებული:

"ეს არის უბრალოდ დიზაინერის კრეატიული მიდგომა. კონკურსანტს შეეძლო გამოეყენებინა ან ერთი თემის სიმბოლიკა, ან მეორესი. მან გადაწყვიტა, რომ ორივე თემის სინთეზი ყოფილიყო".

დიზაინის ავტორმა რეზო მელიქიშვილმა On.ge-სთან საუბარში თქვა, რომ კონკურსის პირობებით, ბარათის დიზაინს უნდა გადმოეცა ორივე მოვლენა.

სატრანსპორტო კომპანიის ცნობით, წარმოდგენილი იყო ბარათის რამდენიმე ნიმუში და შესაბამისმა კომისიამ გამოავლინა გამარჯვებული.

განახლება: მასალის თავადაპირველ ვერსიას ერქვა 100 წლის რესპუბლიკის საიუბილეო მეტრომანზე 1991 წლის დამოუკიდებლობის აღდგენის აქტია დატანილი.