ქრონიკის ინფორმაციით, ცოტა ხნის წინ ერევანში მყოფმა თავდამსხმელებმა, რომელთა მთავარი მოთხოვნაც ქვეყანაში ძირეული ცვლილებების გატარებაა, მიმართვა გაავრცელეს, რომელშიც წერია, რომ ისინი დანებებას არ აპირებენ, თუმცა მათი თვითმიზანი მთავრობაში მოსვლა სულას არაა:

"ჩვენ არ დავნებდებით, ვიცით რას ვაკეთებთ და აქ ვდგავართ. თუ ჩვენ არ ვიქნებით და მოგვკლავენ, მაშინ თქვენ მოგიწევთ ამ ქვეყანაში ცხოვრება. ჩვენ არ გვინდა მთავრობაში მოსვლა, თუნდაც მოვიდეს დროებითი ხელისუფლება, რომელიც განგვსჯის ჩვენ და ამ მთავრობასაც".

ქრონიკის ჟურნალისტის განმარტებით, ყველა ოპოზიციური ლიდერი, რომელიც თავდამსხმელების მიერ აღებულ პოლიციის შენობასთან მიდის ამბობს, რომ მიმდინარე მოვლენები დიდ პოლიტიკურ ამბოხებაში გადაიზრდება.

მისი თქმით, აქციის მონაწილეები, რომლებიც გუშინდელი ღამიდან დგანან პოლიციის შენობის მიმდებარედ, ამბობენ, რომ იმ შემთხვევაში, თუ პოლიცია სპეცოპერაციის გზით ჩაახშობს ამბოხს, მოვლენები მძიმე შედეგით დასრულდება. მაგრამ იმ შემთხვევაში, თუ მეამბოხეები დათმობენ თავიანთ პოზიციებს, მათ აუცილებლად გაასამართლებენ.

ადგილზე მისული მოქალაქეები ამბობენ, რომ თავდამსხმელები მხოლოდ დემოკრატიისა და თავისუფალი სიტყვისთვის იბრძვიან და მთავრობას სთხოვენ, რომ აღნიშნული პირები, როგორც ტერორისტები არ გაასამართლონ.

2 დღის წინ ერევანში, ერებუნის რაიონში, შეიარაღებული დაჯგუფება სატვირთო მანქანებით პოლიციის ტერიტორიაზე შეიჭრა და შენობის აღება სცადა, რის შედეგადაც ერთი პოლიციელი გარდაიცვალა, 3 კი დაშავდა. მათ ასევე აიყვანეს მძევლები, რომელთაგან მოგვიანებით რამდენიმე გაათავისუფლეს.

ამბოხებულების მთავარ მოთხოვნას სომხეთის ოპოზიციური სამოქალაქო ინიციატივის - დამფუძნებელი პარლამენტის კოორდინატორის, ჟირაირა სეფილიანის გათავისუფლებაა, რომელიც იარაღის უკანონო შეძენა-შენახვისათვის არის ბრალდებული. ამასთანავე, თავდამსხმელები ითხოვენ, გადადგეს ქვეყნის პრეზიდენტი და ძალაუფლება ხალხს გადაეცეს.

გამოძიების ინფორმაციით, სეფილიანი შეიარაღებულ დაჯგუფებასთან ერთად აპირებდა შენობების, ტელეკომუნიკაციების, მათ შორის ერევნის სატელევიზიო ანძის დაკავებას.

მათივე ცნობით, დანაშაულებრივი ჯგუფი გეგმავდა ყარაბაღის კონფლიქტის ზონაში ვითარების ესკალაციას პროვოკაციების გზით.