პატრიოტთა ალიანსის წევრი და პარლამენტის დეპუტატი ადა მარშანია On.ge-სთან საუბარში ამბობს, რომ ნეონაცისტური დაჯგუფების ქართული მარშის წევრებს რუსთავი 2-ის შენობასთან ჟურნალისტი არ უცემიათ. მისი თქმით, დავით ერაძე შეგნებულად არავინ უცემია, არამედ მას ხელი მოხვდა. ადა მარშანია მარშის წევრების სასამართლო სხდომაზე ბრალდებულებს თავდებში დაუდგა.

"რუსთავი 2 არ უნდა იყოს ხელშეუხებელი ტელევიზია და მისი ეკრანიდან მოსახლეობას ესმის ძალიან შეურაცხმყოფელი, ვულგარული, ტუტუცური გადაცემები", - ამბობს ადა მარშანია.

სასამართლომ ლადო სადღობელაშვილს და ქართული მარშის კიდევ 5 წევრი პატიმრობაში დატოვა. ნეონაცისტური ჯგუფის წევრებს თავდებად ქართული ოცნების ორი დეპუტატი, გია ჟორჟოლიანი და დავით ჭიჭინაძე და პატრიოტთა ალიანსის ორი დეპუტატი, ადა მარშანია და ემზარ კვიციანი უდგებოდნენ.

19 მარტს ნეონაცისტური დაჯგუფების, ქართული მარშის წევრებმა რუსთავი 2-თან აქცია გამართეს. მათ მიაჩნდათ, რომ ტელეწამყვანმა გიორგი გაბუნიამ მორწმუნეთა "რელიგიურ გრძნობებს" შეურაცხყოფა მიაყენა, როცა 18 მარტს გადაცემა P.S.-ში იესო ქრისტეს ჯვარცმაზე ისაუბრა.

აქციაზე ქართული მარშის წევრებმა, რუსთავი 2-ის ჟურნალისტს დავით ერაძეს სცემეს. მათ რუსთავი 2-ის იურისტის, თამთა მურადაშვილის მანქანას, რომელშიც გიორგი გაბუნიაც იჯდა, ალყა შემოარტყეს. პოლიციამ ქართული მარშის ექვსი წევრი დააკავა. მათ ბრალი ხულიგნობისა და ძალადობის მუხლით წარუდგინეს.