ქართული მარშის ლიდერის, სანდრო ბრეგაძის განცხადებით, პარლამენტის რამდენიმე დეპუტატი ქართული მარშის დაკავებულ წევრების თავდებით გათავისუფლებას ითხოვს. ამის შესახებ ბრეგაძემ On.ge-ს განუცხადა.

მარშის წევრებს თავდებში უდგებიან: ქართული ოცნების წევრები გია ჟორჟოლიანი და დავით ჭიჭინაძე, პატრიოტთა ალიანსის წევრები ადა მარშანია და ემზარ კვიციანი. ასევე, თავდებში უდგება თიანეთის მერი თამაზ მეჭიაური.

ბრეგაძის თქმით, პროკურორმა მარშის წევრებისთვის პატიმრობა მოითხოვა, ადვოკატებმა კი თავდებით გათავისუფლება. როგორც On.ge-ს ჟურნალისტი ადგილიდ იუწყება, სასამართლო პროცესს ადა მარშანია, ემზარ კვიციანი და ჯონდი ბაღათურია ესწრებიან.

19 მარტს, რუსთავი 2-ის ოფისის ეზოში შენობასთან შეკრებილმა ნეონაცისტური დაჯგუფების, ქართული მარშის წევრებმა, ალყა შემოარტყეს ავტომობილს, რომელშიც ჟურნალისტი გიორგი გაბუნია და არხის იურისტი თამთა მურადაშვილი იმყოფებოდნენ. მათ სიტყვიერი შეურაცხყოფა მიაყენეს გიორგი გაბუნიას და შენობაში შესვლის შესაძლებლობა არ მისცეს.

პატიმრობა შეეფარდათ სისხლის სამართლის საქმეზე დაკავებულ გიორგი ონიანს, ლუკა ნაცვლიშვილს, მიხეილ ამისულაშვილს, ლადო სადღობელაშვილს, ირაკლი დოლენჯაშვილს და ბექა რევაზიშვილს. ყველა მათგანს ბრალად ედებათ ხულიგნობა.

ამასთან გიორგი ონიანს ასევე ბრალად ედება ძალადობა (ცემა), რამაც დაზარალებულის ფიზიკური ტკივილი გამოიწვია, მაგრამ არ მოჰყოლია სსსკ-ის 120-ე (ჯანმრთელობის განზრახ მსუბუქი დაზიანება) მუხლით გათვალისწინებული შედეგი. ასევე ლუკა ნაცვლიშვილს გამოძიება სხვისი ნივთის განზრახ დაზიანებას ედავება, რამაც მნიშვნელოვანი ზიანი გამოიწვია.