საპარლამენტო უმრავლესობა პრეზიდენტს სატელევიზიო დებატებს სთავაზობს. მმართველი გუნდი გიორგი მარგველაშვილის პასუხს ელოდება.

საპარლამენტო უმრავლესობის ლიდერის, არჩილ თალაკვაძის განცხადებით, ტელედებატები იქნება საუკეთესო საშუალება, იმისთვის, რომ პრეზიდენტმა უპასუხოს დეპუტატების მიერ დასმულ შეკითხვებს სწორედ იმ ფორმატში, როგორც ეს პრეზიდენტს ყოველწლიური მოხსენების დროს წარმოედგინა.

"თუ საქართველოს პრეზიდენტს ნამდვილად სურს, რომ ჩვენს შეკითხვებს გასცეს პასუხი და კითხვა-პასუხის რეჟიმში მოგვაწოდოს ის ინფორმაცია, რაზეც გუშინ მიგვითითებდა და გვთხოვდა, რეგლამენტის დარღვევით, შეგვეცვალა განხილვის პროცესი. ჩვენ ვთავაზობთ სატელევიზიო დებატს და კითხვა-პასუხის რეჟიმში მზად ვართ, მთელი საზოგადოების თვალწინ, დავუსვათ კითხვები და ის მოსაზრებები ვუთხრათ, რის თქმასაც გუშინ ვაპირებდით", - განაცხადა არჩილ თალაკვაძემ.

მას შემდეგ, რაც პრეზიდენტის ადმინისტრაცია უმრავლესობის შეთავაზებას უპასუხებს, გაირკვევა, რომელ არხზე შედგება სატელევიზიო დებატები და ვინ იქნება მარგველაშვილის ოპონენტი უმრავლესობიდან.

2 მაისს, პრეზიდენტის ყოველწლიური მოხსენების დროს, პარლამენტში, გიორგი მარგველაშვილმა პროტესტის ნიშნად სხდომათა დარბაზი დატოვა. მას სურდა ეპასუხა იმ კითხვებისთვის, რასაც დეპუტატები უსვამდნენ, იმ ფორმატით, რომელიც რეგლამენტით გათვალისწინებული არ იყო. საქართველოს პარლამენტის თავმჯდომარემ საკითხი, დებატების ფორმატის შეცვლის შესახებ კენჭისყრაზე დააყენა.

დეპუტატებმა პრეზიდენტის ინიციატივას მხარი არ დაუჭირეს, რის შემდეგაც გიორგი მარგველაშვილმა პარლამენტის შენობა დატოვა და არც დასკვნითი სიტყვის უფლება გამოიყენა.