საქალაქო სასამართლომ თაღლითობის, ქრთამის აღებისა და შრომის კანონმდებლობის დარღვევისათვის ბრალდებული თბილისის საკრებულოს ყოფილ მაჟორიტარ წევრს, ზურაბ ნეფარიძეს 11 წელი მიუსაჯა.

ნავთლუღის რაიონის მაჟორიტარ დეპუტატს, ბრალად ედებოდა თაღლითობა, მართლსაწინააღმდეგო მისაკუთრების მიზნით სხვისი ნივთის დაუფლება მოტყუებით.

საქმის დეტალები

ბრალდების მხარის ვერსიით, 2014 წლის 15 აგვისტოდან, 2017 წლის 31 მარტის ჩათვლით, ბრალდებული საკუთარ ოფისში, წინასწარი შეთანხმების საფუძველზე, ფიქტიურ თანამშრომლად გაფორმებული მოქალაქის სახელფასო ანგარიშიდან, საერთო ჯამში 36 552,5 ლარს მოტყუებით დაეუფლა.

პროკურატურის ცნობით, ის ასევე ორ სხვა თანამშრომელს, ურიცხავდა იმაზე მეტ ხელფასს, ვიდრე ეკუთვნოდათ და ზედმეტად დარიცხულ თანხას თავად ეუფლებოდა.

"2017 წლის აგვისტოდან, 2017 წლის აგვისტოს ჩათვლით პერიოდში თბილისის მუნიციპალიტეტის საკრებულოს კუთვნილ 11 100 და 1 500 ლარს, ბრალდებული მოტყუებით დაეუფლა. მან ასევე აიძულა რამდენიმე შტატგარეშე მოსამსახურე, სამსახურის შენარჩუნების სანაცვლოდ, ყოველთვიურად, მისთვის გარკვეული თანხა გადაეცათ, საბოლოო ჯამში, ქრთამის აღების 4 ეპიზოდში, ბრალდებული ქრთამის სახით 16 040 ლარს დაეუფლა. თანხის გამოძალვასთან დაკავშირებით, მაჟორიტარს ერთ-ერთ თანამშრომელთან ურთიერთობა დაეძაბა და საბოლოოდ, 2017 წლის 25 აგვისტოს, აიძულა ეს უკანასკნელი ხელი მოეწერა განცხადებაზე, სამსახურიდან გათავისუფლების თაობაზე", - ნათქვამია სასამართლოს განცხადებაში.

ამავე თემაზე: