თბილისის სპორტის სასახლეში გამართულ თავისუფალი დემოკრატების ყრილობაზე პარტიის ლიდერმა მოსახლეობას ის დაპირებები შეახსენა, რომელსაც გუნდი არჩევნებში გამარჯვების შემთხვევაში შეასრულებს.

ალასანიას თქმით, თავისუფალ დემოკრატებს აქვთ კონფლიქტების მოგვარების რესურსი, ამას გარდა, ისინი ბოლომდე მიიყვანენ შერიგების პროცესს კონფლიქტურ რეგიონებთან.

თავისუფალი დემოკრატების ლიდერი მოსახლეობას სოფლის მეურნეობის განვითარებას და ინფრასტრუქტურის მოწესრიგებასაც დაჰპირდა.

"შევუქმნით ყველა პირობას გლეხებს, მიწის გადაცემის პროცესს კი 2 წელიწადში დავასრულებთ".

ალასანიას თქმით, მის გუნდს აქვს განათლების სისტემის განვითარების და სოციალური პრობლემების მოგვარების ზუსტი გეგმა:

"მილიარდ ნახევარი წავა სოციალურ პრობლემებში, პენსია გახდება 300 ლარი, კანონმდებლობით მინიმალური სახელფასო საათობრივი ანაზღაურება 3 ლარი გახდება, რაც ხელფასის მინიმალურ ზღვარს 500 ლარამდე ასწევს".

ირაკლი ალასანია ამომრჩეველს გამარჯვების შემთხვევაში ე.წ. კაბელების საქმეზე დაკავებული 6 პირის გათავისუფლებას დაჰპირდა.