თბილისის მერია ქალაქის სისუფთავეზე სოციალურ კამპანიაში - "გაუფრთხილდი ქალაქს" 600 000 ლარს დახარჯავს. მომსახურების შეძენა პირდაპირი წესით, ტენდერის გარეშეა დაგეგმილი. ამ საკითხზე ააიპ საზოგადოებასთან კომუნიკაციის განვითარების სააგენტო შესყიდვების სააგენტოს თანხმობას ელოდება.

როგორც შესყიდვების სააგენტოსთვის მიწოდებული ინფორმაციიდან ირკვევა, სამეტაპიანი კვლევა საზოგადოების მიერ აღიარებული წესების დარღვევებზე ადამიანების ცოდნას შეისწავლის. კამპანიის ფარგლებში გათვალისწინებულია "თბილისზე მზრუნველობის დღის" დაწესება და ორგანიზება.

"კამპანიის წარმოება დაკავშირებულია ადამიანურ ემოციებთან, აღქმადობასთან, აქედან გამომდინარე, უპირველესად საჭიროა, გავარკვიოთ რა იწვევს მოქალაქეთა ვანდალურ ქცევას, რათა კამპანიის დაგეგმვისას, ვიხელმძღვანელოთ კვლევის შედეგებით. სწორედ ამიტომ, საზოგადოებრივი აზრის კვლევა, კამპანიის წარმოების განუყოფელი ნაწილია", - აცხადებენ მერიაში.

როგორც მერიაში აღნიშნავენ, ქალაქის კეთილმოწყობასა და დასუფთავებაში წლის განმავლობაში ბიუჯეტიდან მილიონობით ლარი იხარჯება, ეს კამპანია კი მიმართული იქნება საზოგადოებრივი წესრიგის დარღვევის, ვანდალიზმის და დანაგვიანების წინააღმდეგ.

"ჩვენი ამოცანაა, საზოგადოებას შევახსენოთ, რომ ნებისმიერი ვანდალური საქციელი გარდა იმისა, რომ ანტისახელმწიფოებრივია, არის ხარჯიანიც. დაზიანებული სკვერის, მოპირკეთებული ბორდიურის, დამაგრებული ილუმინაციების მეორედ გაკეთება და ა.შ მნიშვნელოვნად ზრდის დანახარჯებს, როგორც მატერიალური, ასევე ადამიანური რესურსის მხრივ", - აღნიშნავენ მერიაში.

მათივე განმარტებით, კამპანიის ფარგლებში დაგეგმილი აქტივობებისათვის საჭიროა დაიწეროს სცენარები, დაიგეგმოს აქცია-ღონისძიებები, დამზადდეს ვიდეო რგოლები, პოსტერები, გაიმართოს კონკურსები, შემუშავდეს მედია გეგმა და ა.შ.

"ტენდერისა და კონკურსის საშუალებით შესაძლებელი იქნება გამოვლინდეს გამარჯვებული მხოლოდ წინასწარ დადგენილი, ჩარჩოში მოქცეული კრიტერიუმების მიხედვით ელექტრონული სისტემის საშუალებით, რაც არ იძლევა შესაძლებლობას, პოლიტიკის განმსაზღვრელი უწყების მიერ, შემოთავაზებული კონცეფციებიდან გამომდინარე იქნეს შეფასებული კამპანიის მიზანშეწონილობა და ასევე, კონცეფციის ავტორის მიერ იქნეს კამპანია განხორციელებული", - ასე განმარტავს თბილისის მერიის საზოგადოებასთან კომუნიკაციის განვითარების სააგენტო ტენდერის გარეშე შესყიდვის აუცილებლობას.

ფოტო: თბილისის მერია