პარლამენტის თავმჯდომარე და პარტია ქართული ოცნების აღმასრულებელი მდივანი, ირაკლი კობახიძე Freedom House-ს ანგარიშში გამოთქმულ დასკვნებს პასუხობს და აცხადებს, რომ ბრალდებები არაფორმალურ მმართველობაზე საფუძველს მოკლებულია. მისივე თქმით, ანგარიშის ავტორები ამგვარი მმართველობის ნიშნებს ვერ აკონკრეტებენ:

"ანგარიშის ავტორები ვერ მალავენ უარყოფით დამოკდიებულებას ბიძინა ივანიშვილის მიმართ, რომელიც დემოკრატიული გარდატეხის მთავარი შემოქმედია საქართველოში".

კობახიძის თქმით, ანგარიში იმეორებს ყოფილი პრეზიდენტის, მიხეილ სააკაშვილისა და მისი სხვა მეგობრების ხელოვნურ სურათს, რომელიც "შენების ნგრევად წარმოჩენას ცდილობს":

"ბიძინა ივანიშვილის მიმართ სუბიექტური დამოკიდებულების ყველაზე ნათელი გამოვლინებაა პანორამა თბილისთან დაკავშირებით კრიტიკა, რაც მოკლებულია დასაბუთებას".

საერთაშორისო უფლებადამცველი ორგანიზაცია Freedom House გარდამავალ ეტაპზე მყოფი ქვეყნების შესახებ ანგარიშში, საქართველოში არსებულ არაფორმალურ მმართველობაზე წერს.

ანგარიშში ვკითხულობთ: "მილიარდერმა ბიძინა ივანიშვილმა პრემიერ-მინისტრის პოსტი 2014 წელს დატოვა, მაგრამ ის კონტროლს ინარჩუნებს მმართველ ქართული ოცნების პარტიაზე, რომელიც მისი კერძო კომპანიების თანამშრომლებითაა დაკომპლექტებული. ივანიშვილის პოლიტიკური ვენდეტა და დედაქალაქის განვითარების გეგმები ბუნდოვანს ხდის ქართულ პოლიტიკას".