შინაგან საქმეთა სამინისტროს ინფორმაციით, პარლამენტის წინ ტყიბულის სოლიდარობის აქციაზე აუდიტორია 115-ის ხუთი აქტივისტი დააკავეს.

უწყების განმარტებით, პარლამენტის მიმდებარე ტერიტორიაზე აქციის მონაწილეებმა რუსთაველის გამზირზე საავტომობილო გზის გადაკეტვა სცადეს. პოლიციამ ხუთი პირი ადმინისტრაციულ სამართალდარღვევათა კოდექსის 166-ე და 173-ე მუხლებით, ვრილმანი ხულიგნობისა და პოლიციელისათვის დაუმორჩილებლობის ფაქტზე დააკავა.

ფოტო: On.ge

მსვლელობის ორგანიზატორები და იქ მისული ადამიანები შრომის უსაფრთხოების არსებულ მდგომარეობას ეწინააღმდეგებიან. ტყიბულელი მეშახტეების სოლიდარობის ნიშნად აქციის მონაწილეები თეთრი ყვავილებით მივიდნენ.

დღევანდელი აქცია უკავშირდება 5 აპრილის შემთხვევას. ტყიბულის შახტში 6 მუშა დაიღუპა, ხოლო სამი დაშავდა. ერთ-ერთი ორგანიზატორის, ირაკლი კუპრაძის განცხადებით, ამ შემთხვევაზე პასუხისმგებლობა ეკონომიკურმა გუნდა უნდა აიღოს. ისინი, ასევე, შრომის უსაფრთხოების გამოსწორებას ითხოვენ.

ორგანიზატორები, ასევე, შრომის უსაფრთხოების ახალ კანონს აფასებენ და ამბობენ, რომ ის არაეფექტური იქნება. მათი თქმით, კანონი არა ადამიანზე, არამედ ბიზნესზეა ორიენტირებული. ისინი, ეკონომიკის მინისტრის, დიმიტრი ქუმსიშვილის გადადგომასაც ითხოვენ.