პოსტკონფლიქტური დარეგულირების საკითხებში დე ფაქტო სამხრეთ ოსეთის რესპუბლიკის პრეზიდენტის რწმუნებულის აპარატის ხელმძღვანელმა, მურატ ჯიოევმა განაცხადა, რომ "ოთხოზორია-ტატუნაშვილის" სია პირველ რიგში პოლიტიკური დოკუმენტია. ინფორმაციას სახელმწიფო საინფორმაციო სააგენტო რესი ავრცელებს.

"ქართველ პარლამენტარებს, პირველ რიგში, აინტერესებდათ არა ტატუნაშვილის სიკვდილი, არამედ რუსეთისთვის კიდევ ერთი ბრალდების წაყენება, რომელიც ამ საქმეს საერთოდ არ უკავშირდება. და მეორე, ხაზი გაესვათ საქართველოს ნატოს მხარდამჭერი ორიენტაციისთვის, რაც ჟენევაში ქართულ დელეგაციას ვუთხარი", - განაცხადა ჯიოევმა.

საქართველოს პარლამენტმა რუსეთის ფედერაციის მიერ ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და ოთხოზორია-ტატუნაშვილის სიის შესახებ რეზოლუცია 21 მარტს დაამტკიცა.

საქართველოს მთავრობამ 2018 წლის 15 ივნისამდე პარლამენტს უნდა წარუდგინოს ე.წ. ოთხოზორია-ტატუნაშვილის სია. სიაში უნდა შევიდნენ ოკუპირებულ ტერიტორიებზე საქართველოს მოქალაქეთა მკვლელობაში, გატაცებაში, წამებასა და არაჰუმანურ მოპყრობაში, ჯანმრთელობის მძიმე დაზიანებაში, აგრეთვე ამ დანაშაულთა დაფარვაში ბრალდებული და მსჯავრდებული პირები.

არჩილ ტატუნაშვილი 22 თებერვალს ცხინვალის ციხეში გაურკვეველ ვითარებაში გარდაიცვალა. მისი ცხედარი 26-დღიანი ლოდინის შემდეგ, საქართველოს ხელისუფლებას 20 მარტს გადასცეს. რეზოლუციის მიღების საკითხი პარლამენტში არჩილ ტატუნაშვილის გარდაცვალების შემდეგ გახდა აქტუალური.

არჩილ ტატუნაშვილის საქმე დეტალურად წაიკითხეთ აქ.