ქართული ოცნების დეპუტატი, დავით ჭიჭნაძე საქართველოდან რუსი დიპლომატის გაძევებაზე ამბობს, რომ ეს გადაწყვეტილება მთავრობას მანამ უნდა მიეღო, სანამ ევროპული საქართველოს წევრი, სერგი კაპანაძე მოითხოვდა.

"სერგი კაპანაძემ მოითხოვა, მე როგორც ვიცი, და ჩვენი ხელისუფლება ისევ აყვა. მე ვფიქრობ, რომ რასაც თხოულობს ჩვენი ოპოზიცია, ყველაფერი არის ჩვენი ქვეყნის საწინააღმდეგო".

მისი განმარტებით, რუსი დიპლომატის გაძევებით, რუსეთს არანაირი ზიანი არ მიადგება.

რუსი დიპლომატების გაძევება

დღეს, 29 მარტს ცნობილი გახდა, რომ სკრიპალის სკანდალის გამო რუს დიპლომატს საქართვველოდანაც გააძევებენ. შვეიცარიის კონფედერაციის საელჩოს რუსეთის ინტერესების სექციის თანამშრომელს, რომელიც მიუღებელ პიროვნებად გამოცხადდა, საქართველოს დატსატოვებლად 7 დღე მიეცა.

ყოფილი რუსი ჯაშუში სერგეი სკრიპალი და მისი შვილი იულია, ბრიტანეთის ქალაქ სოლსბერიში 4 მარტს ნერვო-პარალეპტიკური ნივთიერებით მოწამლეს. ისინი ამ დრომდე მძიმე მდგომარეობით საავადმყოფოში არიან. ბრიტანეთის ოფიციალური პოზიციით, საქმეში რუსეთი მონაწილეობს.

ბრიტანეთის მხარდასაჭერად, საერთო ჯამში, აშშ-დან, კანადიდან და ევროპის ქვეყნებიდან, სულ 20-ზე მეტი ქვეყნიდან 150-ზე მეტი რუსი დიპლომატი გააძევეს. რუსული მისიის დიპლომატების რიცხვი შეამცირა ნატომაც. სკრიპალის სკანდალის გამო რუსეთიდან დროებით გაიწვია თავისი ელჩი ევროკავშირმაც.

რუსეთი ბრალდებებს უარყოფს და ამბობს, რომ ამ დრომდე სკრიპალების საქმის დეტალებს არ იცნობს და ლონდონს ცილისმწამებლური პოზიცია უჭირავს. მოსკოვმა ლონდონის ნაბიჯების საპასუხოდ, ქვეყნიდან 23 ბრიტანელი დიპლომატი გააძევა.