ეკონომიკის სამინისტროს ინფორმაციით, შოთა რუსთაველის სახელობის თბილისის საერთაშორისო აეროპორტის ასაფრენი ზოლის სარეაბილიტაციო სამუშაოები დასრულდა.

ბილიკის რეაბილიტაცია 12 კვირაში დასრულდა. განახლებული ასაფრენ-დასაფრენი ზოლი დღეს ეკონომიკის მინისტრმა დიმიტრი ქუმსიშვილმა გახსნა.

ქუმსიშვილმა აღნიშნულ პროექტს სიმბოლური, წარმატებული და გამორჩეული უწოდა:

"ნამდვილად საამაყოა ის ფაქტი, რომ ასეთი შეზღუდული ვადების, უდიდესი მოცულობის და დაძაბულობის ფონზე პროექტის ყველა მონაწილემ შეძლო საერთო საქმისთვის გაერთიანება. სწორედ ამ წარმოუდგენელი და უპრეცენდენტო პროექტის შედეგად, ჩვენ გვაქვს სრულად განახლებული ასაფრენი ზოლი და ახალი II კატეგორიის სანავიგაციო შუქტექნიკა, რომელიც უზრუნველყოფს კიდევ უფრო მეტ უსაფრთხოებას და კომფორტს ავიაკომპანიებისა და მგზავრებისთვის".

განათების ახალი სისტემა აამაღლებს ფრენების უსაფრთხოების დონეს საქართველოში

პირველი ვიცე-პრემიერის განცხადებით, თბილისის აეროპორტის რეაბილიტაციის და განახლების პროცესი გრძელდება, კეთდება საჰაერო ხომალდების ახალი სადგომები და დაწყებულია ახალი მოფრენის ტერმინალის მშენებლობა.

შუქ-სასიგნალო სისტემის უზრუნველსაყოფად ეკონომიკის სამინისტროს შპს საქაერონავიგაციამ იტალიელ, უკრაინელ და ფრანგ კოლეგებთან ერთად 10 მილიონ ლარზე მეტი ინვესტიცია განახორციელა.

ფოტო: ეკონომიკისა და მდგრადი განვითარების სამინისტრო

ეკონომიკის სამინისტროს ინფორმაციით, განათების ახალი სისტემა კიდევ უფრო აამაღლებს ფრენების უსაფრთხოების დონეს საქართველოში და საჰაერო ხომალდებს, ძლიერი ნისლის, ცუდი მეტეოპირობებისა და მხედველობის დროს, აფრენა-დაფრენას საგრძნობლად გაუადვილებს.

აეროპორტის ინფრასტრუქტურის განვითარებასა და სანავიგაციო სისტემების განახლებაში 70 მილიონ ლარზე მეტი ინვესტიცია განხორციელდა. პროექტის ფარგლებში დასაქმდა 200-მდე ადამიანი. სამუშაოებზე მობილიზებული იყო 60-ზე მეტი ერთეული ტექნიკა, რისთვისაც კომპანია Black Sea Group-მა 7 200 000 აშშ დოლარის ოდენობის ინვესტიცია განახორციელა.

ეკონომიკის სამინისტროს ინფორმაციით, ბილიკის რეაბილიტაციის პროცესში დაიგო 135.000 ტონა ასფალტი და მისი მშენებლობისთვის გამოყენებულ იქნა ზუსტად ის ტექნოლოგია, რომლითაც აბუ-დაბის ფორმულა 1-ის სარბოლო მოედნის მშენებლობა განხორციელდა.