ბიბლიოთეკარებს ტესტირებისთვის მოსამზადებლად, დამატებით ერთი თვე მიეცემათ. ამის შესახებ დღეს, 26 მარტს თბილისის მერის მოადგილე სოფიო ხუნწარიამ დედაქალაქის მერიაში ბიბლიოთეკარებთან გამართულ შეხვედრაზე განაცხადა.

მერის მოადგილის თქმით, ტესტირების თარიღის გადაწევა ბიბლიოთეკარებმა წინა შეხვედრაზე ითხოვეს.

"ჩვენ უკვე მესამედ შევხვდით ბიბლიოთეკარებს და კიდევ ერთხელ განვუმარტეთ, თუ რა პროცედურებია საჭირო იმისთვის, რომ ტესტირებამდე სწორად მივიდეთ. მეორე შეხვედრაზე ბიბლიოთეკარების მხრიდან იყო თხოვნა, რომ კიდევ ერთი თვით გადაგვედო სამზადისი, რომ თავის თავში განმტკიცებულიყვნენ და ტესტირებამდე სწორად მივსულიყავით, რაც დაკმაყოფილდა", - განაცხადა სოფიო ხუნწარიამ.

ბიბლიოთეკარების ტესტირება 29 აპრილს იყო დაგეგმილი.

ბიბლიოთეკების რეფორმის ფარგლებში, პერსონალს საკვალიფიკაციო ტესტირების გავლა მოუწევს. ორი თვის განმავლობაში, თითოეული თანამშრომლის გადამზადება მოხდება, ტესტირების წარმატებით გავლის შემდეგ კი, ისინი თბილისის მერიის მიერ დაფუძნებულ ახალ ა(ა)იპ-ში დასაქმდებიან.

ბიბილიოთეკებთან დაკავშირებით დაგეგმილ რეფორმებს ბიბლიოთეკარების მხრიდან პროტესტი მოჰყვა. მათი თქმით, რეფორმის ფარგლებში მათ შესაძლოა სამუშაო ადგილები დაკარგონ.