თბილისის მერის, კახა კალაძის განცხადებით, ოკუპაციის მსხვერპლთა ხსოვნის უკვდავყოფისთვის, თბილისში მათი სახელობის პარკი გაშენდება, სადაც განთავსდება მემორიალიც:

"ჩვენ ყველანი ვგლოვობთ არჩილ ტატუნაშვილს და მის ოჯახთან ერთად ვიზიარებთ ამ ტკივილს. იმედი მაქვს, რომ ის იქნება უკანასკნელი მსხვერპლი, რომელიც შეიწირა საოკუპაციო რეჟიმმა. ჩვენ სათანადო პატივი უნდა მივაგოთ არა მარტო არჩილს, არამედ საქართველოს დამოუკიდებლობისთვის მებრძოლებს და ოკუპაციას შეწირულ მშვიდობიან მოსახლეობას".

კალაძის თქმით, მერია შესაბამისი ადგილის შერჩევას დღესვე დაიწყებს, ხოლო მემორიალის პროექტზე კონკურსი გამოცხადდება.

არჩილ ტატუნაშვილი თითქმის ერთი თვის წინ, 22 თებერვალს ცხინვალის ციხეში გაურკვეველ ვითარებაში გარდაიცვალა. დე ფაქტო ხელისუფლებამ მისი ცხედარი ქართულ მხარეს გარდაცვალებიდან 26-ე დღეს დაუბრუნა. არჩილ ტატუნაშვილის ცხედარი ოკუპირებული ტერიტორიიდან 20 მარტს გადმოასვენეს. ცხედარი ჯერ სამხარაულის სახელობის ექსპერტიზაზე გადაასვენეს, შემდეგ კი ოჯახს დაუბრუნეს. ცხინვალის ციხეში მოკლულ არჩილ ტატუნაშვილს შაბათს, ქანდაში, სამხედრო პატივით დაკრძალავენ.

სახელმწიფო უსაფრთხოების სამსახურის ინფორმაციით, ოსური მხარე აცხადებდა, რომ ტატუნაშვილი ინფარქტით დაიღუპა. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ მაშინ პოზიცია შეცვალა.