არასამთავრობო ორგანიზაციები ნეო-ნაცისტური დაჯგუფების ქართული მარშის წარმომადგენლების მიერ, ტელეკომპანია რუსთავი 2-ის ჟურნალისტებზე თავდასხმისა და შეურაცხყოფის ფაქტს ეხმაურებიან.

განცხადებაში ნათქვამია, რომ სიტყვის გამოხატვისა და მედიის თავისუფლება გარანტირებულია როგორც საქართველოს კონსტიტუციით, ასევე ადამიანის უფლებათა ევროპული კონვენციით.

"პროტესტის გამოხატვის ფორმები არ უნდა სცილდებოდეს კანონით დადგენილ სტანდარტებს და არ უნდა შეიცავდეს ძალის გამოყენებას", - ვკითხულობთ განცხადებაში.

განცხადების ხელმომწერი არასამთავრობო ორგანიზაციები მოუწოდებენ სამართალდამცავ ორგანოებს დროულად გამოიძიონ რუსთავი 2-ის ჟურნალისტებზე თავდასხმისა და შეურაცხყოფის ფაქტი და უზრუნველყონ ქვეყანაში მედიის საქმიანობისთვის უსაფრთხო გარემოს შექმნა.

"მისასალმებელია ტელეკომპანია რუსთავი 2 -ის ეთიკის საბჭოს გადაწყვეტილება ქრისტიან მორწმუნეთა რელიგიური გრძნობების შეურაცხყოფის გამო საყვედურის გამოცხადების თაობაზე", - ვკითხულობთ განცხადებაში.

განცხადებას ხელს აწერენ ორგანიზაციები:

  • საერთაშორისო გამჭვირვალობა - საქართველო;
  • ინფორმაციის თავისუფლების განვითარების ინსტიტუტი (IDFI);
  • ეკონომიკური პოლიტიკის კვლევის ცენტრის (EPRC);
  • საზოგადოება და ბანკები.

ტელეკომპანია რუსთავი 2-ის შენობასთან ქართული მარშის 6 წევრი დააკავეს. მარშის წევრებმა ტელეკომპანიის თანაშრომლებს სიტყვიერი და ფიზიკური შეურაცყოფა მიაყენეს.

შინაგან საქმეთა სამინისტრო დაკავებულებს სამართალდამცავისადმი დაუმორჩილებლობასა და წვრილმან ხულიგნობას ედავება.