საქართველოს პარლამენტის წევრმა უმრავლესობიდან, დიმიტრი ხუნდაძემ პარლამენტში ცხინვალის ციხეში გარდაცვლილი არჩილ ტატუნაშვილის საქმესთან დაკავშირებით რუსეთზე ისაუბრა.

"ეჭვგარეშეა, რომ დღეს ჩვენს ნერვებზე თამაში რუსეთის მხრიდან ახალი კონფლიქტის პროვოცირებაა. მსურს მოვუწოდო საზოგადოებას, დღეს ამ ტკივილის მოსმენა ჩვენი ღირსების შელახვა არ არის. პირიქით, ეს ჩვენი კიდევ უფრო დიდი ღირსება და წინდახედულობაა, რადგან მხოლოდ გონივრული ქმედებით არის შესაძლებელი იქნას მიღწეული სასურველი შედეგი. ემოციების მოთოკვა და გონივრული ქმედება უპირველეს ყოვლისა პოლიტიკოსებს გვმართებს", - თქვა ხუნდაძემ.

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა. იმის მიუხედავად, რომ ტატუნაშვილის გარდაცვალებიდან თითქმის ორი კვირა გავიდა, ცხედარი ოჯახისთვის მაინც არ გადაუციათ.