საქართველოს განათლებისა და მეცნიერების სამინისტრომ პროფესიული განათლების მიმართულებით რეფორმების გატარება დაიწყო, რომლის მიხედვითაც პროფესიულ კოლეჯებს უმაღლესი სასწავლებლების ბაზაზე ფუნქციონირების შესაძლებლობა მიეცემათ.

განათლების სამინისტროს პოზიციით, პროფესიული განათლების სტუდენტები პროფესიას უმაღლეს საგანმანათლებლო დაწესებულებებში დაეუფლებიან, რაც ხელს შეუწყობს პროფესიული განათლების პრესტიჟის ამაღლებას და სტუდენტებს შესაძლებლობას მისცემს, შემდგომ საფეხურზე სწავლა, იმავე სივრცეში განაგრძონ.

დღეს, მთავრობის სხდომაზე გამოიცა განკარგულება, რომლის მიხედვითაც ივანე ჯავახიშვილის სახელობის თბილისის სახელმწიფო უნივერსიტეტის ბაზაზე მედიისა და ტელეხელოვნების კოლეჯი გაიხსნება.

განათლების სამინისტროს მიერ გავრცელებულ განცხადებაში ვკითხულობთ, რომ კოლეჯი ყველა საფეხურის პროფესიულ საგანმანათლებლო პროგრამას განახორციელებს. ასევე უზრუნველყოფს მოსამზადებელ პროგრამებს ზოგადსაგანმანათლებლო, ქართული ენისა და ლიბერალური განათლების საკითხებში.

კოლეჯი განახორციელებს სხვადასხვა ხანგრძლივობის სასერტიფიკატო და კვალიფიკაციის ასამაღლებელ ისეთ სასწავლო კურსებს, რომელიც არ საჭიროებს კვალიფიკაციის დამადასტურებელი დოკუმენტის გაცემას.

"საზოგადოებრივი კოლეჯის მიზანი იქნება სხვადასხვა დანიშნულების, ჟანრისა და ფორმატის ისეთი მულტიმედია პროდუქციის წარმოება და გავრცელება, რომელიც ხელს უწყობს პროფესიული განათლების პოპულარიზაციას და მედიისა და ტელე ხელოვნების განვითარებას", - ვკითხულობთ განცხადებაში.

ჯერჯერობით უცნობია, ახალი პროფესიული კოლეჯის სწავლების კონცეფცია. როგორც On.ge - ს თსუ-ის პრესცენტრში განუცხადეს დეტალების დაზუსტება მიმდინარეობს.