ცხინვალის ციხეში გარდაცვლილი არჩილ ტატუნაშვილის ცხედრის ქართული მხარისთვის გადაცემის მოთხოვნა ცხინვალში გააპროტესტეს. ინფორმაციას რუსეთის ხელისუფლების მიერ დაფინანსებული მედია ავრცელებს.

ოსური მედიის ცნობით, აქცია "ქართველების მხრიდან ოსების მიმართ ჩადენილ გენოციდს მიეძღვნა".

"სამხრეთ ოსეთის საზოგადოებამ გაურკვევლად მიიღო დასავლეთის ქვეყნებისა და საერთაშორისო ორგანიზაციების მშფოთვარე რეაქცია ტატუნაშვილის საქმესთან დაკავშირებით", - ადგილობრივი სახელისუფლო მედიის თქმით, ერთ-ერთმა ინიციატორმა განაცხადა.

ოსური მედიის ცნობით, აქციაზე საბრძოლო მოქმედებების დროს დაღუპული და უგზო-უკვლოდ დაკარგული ოსი მებრძოლების ოჯახის წევრები იყვნენ მისულები. ისინი, ასევე, მოითხოვდნენ, რომ საქართველოში დაღუპული ოსი მებრძოლეების ცხედრები ოჯახებს დაუბრუნდეთ. აქციას თვითაღიარებული ხელისუფლების წარმომადგენლებიც ესწრებოდნენ.

ტატუნაშვილის საქმე

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენებინა, თუმცა დე ფაქტო ხელისუფლებამ პოზიცია შეცვალა.

ახალგორში არჩილ ტატუნაშვილთან ერთად დაკავებული იყო საქართველოს კიდევ ორი მოქალაქე. სუს-ის ცნობით, ლევან ქუტაშვილი და იოსებ პავლიაშვილი უკვე ცხინვალის ციხიდან ახალგორში გადაიყვანეს. ოსური მხარე მათ გადმოცემაზე უარს ამბობს.

შესწორება: მასალის თავდაპირველი ვერისიის სათაურში ეწერა: "ცხინვალში საპროტესტო აქციით ტატუნაშვილის ცხედრის ოჯახისთვის გადაცემას ეწინააღმდეგებიან", რაც მოგვიანებით შეიცვალა.