ტელეკომპანია რუსთავი 2-ის ინფორმაციით, აჭარაში 25 მოსწავლე სექსმუშაკად მუშაობს, რომელთა რაოდენობაც ტურისტული სეზონის დროს იზრდება. ამ თემაზე მასალა ტელეკომპანიის ეთერში დღეს, 3 მარტს გავიდა.

"სპეციალური ჯგუფები გოგონებს ქუჩაში ეძებენ, შემდეგ ბინაში ან ღამის კლუბში მიჰყავთ, სამსახურს სთავაზობენ და საბოლოოდ კი, სექსმუშაკებად საქმდებიან", - ნათქვამია რუსთავი 2-ის სიუჟეტში.

სიუჟეტში არასრულწლოვანი ჟურნალისტს უყვება, რომ პროსტიტუციის შესახებ სამართალდამცავებმა იციან, თუმცა აჭარაში ე.წ. დისკობარებს თავად პოლიცია მფარველობს.

აჭარაში პროსტიტუციის შემთხვევებს ადასტურებს არხთან მიცემულ ინტერვიუში ავტონომიური რესპუბლიკის ჯანმრთელობისა და სოციალური დაცვის მინისტრი.

"არაერთხელ მოგვმართეს როგორც სტრუქტურიდან, ისე არასამთავრობო ორგანიზაციებიდან... რამდენადაც შესაძლებელია ჩვენი ჩართულობა, ჩვენ სამედიცინო რეაბილიტაციის უზრუნველვყოფთ ჯერ ამ ეტაპზე და მალე უკვე გაჩნდება კერა შეიძლება უკვე მაქსიმალურად დღის სტაციონარის მსგავს პირობებში შევძლოთ მხარდაჭერა ასეთი მოქალაქეების", - უთხრა რუსთავი 2-ს აჭარის ავტონომიური რესპუბლიკის ჯანდაცვის მინისტრმა.