სასამართლოდან დღეს გირაოთი გათავისუფლებული მუსტაფა ემრე ჩაბუქი ამბობს, რომ ის პოლიტიკური პატიმარი იყო. ასე უპასუხა მან ჟურნალისტების მიერ დასმულ კითხვას თავის პატიმრობასთან დაკავშირებით.

"მე ვარ მასწავლებელი და შეყვარებული ვარ განათლებაზე. 15 წელია საქართველოში იმ პრინციპით ვმოღვაწეობ, რომ ბავშვებში იყოს ჩანერგილი მშვიდობა, მეგობრობა და სიყვარული. ყოველთვის წინააღმდეგი ვარ ტერორიზმის, ჩხუბის. ათასობით მეგობრები, მოსწავლეები მყავს საქართველოში. ყოველთვის ჩვენი პროექტები ფასდებოდა დადებითად. მინდა ავღნიშნო, რომ მთავრობისგანაც, განათლების სამინისტროსგანაც ყოველთვის დადებითად ფასდებოდა ჩვენი საქმიანობა. ლეგალურად თუ არალეგალურად მე ვერ ვიქნები ტერორიზტული ორგანიზაციების წევრი, ან მომხრე", - აღნიშნა ჩაბუქმა და მადლობა გადაუხადა თავის მხარდამჭერებს.

მუსტაფა ემერე ჩაბუქი თბილისის საქალაქო სასამართლომ 1000-ლარიანი გირაოთი დაახლოებით ერთი საათის წინ გაათავისუფლა. ჩაბუქს პატიმრობის ვადა 5 დღეში, 24 თებერვალს ისედაც ეწურებოდა.

დემირელის კოლეჯის ხარისხის მართვის მენეჯერი, მუსტაფა ემრე ჩაბუქი შეიარაღებული ტერორისტული ორგანიზაციის წევრობის ბრალდებით, თურქეთის მოთხოვნით, თბილისში 2017 წლის 24 მაისს დააკავეს. სასამართლომ მის ექსტრადირებაზე უნდა იმსჯელოს.