სახელმწიფო აუდიტის სამსახურმა თბილისის მერიის მიერ 2015-2016 წლებში გამოცხადებული ტენდერები შეისწავლა და დაასკვნა, რომ შესყიდვებში მონაწილე პირები, სავარაუდოდ, შეთანხმებულად მოქმედებდნენ. აუდიტის სამსახურში განმარტავენ, რომ ამით სახელმწიფო ბიუჯეტი არაეკონომიურად დაიხარჯა.

"გამოიკვეთა ისეთი შესყიდვები, როცა ყველაზე დაბალი ფასის მქონე პრეტენდენტებმა არ დააზუსტეს ტექნიკური დოკუმენტაცია, რაც მათი დისკვალიფიკაციის საფუძველი გახდა. სატენდერო კომისიის გადაწყვეტილებით, გამარჯვებულად გამოცხადდნენ უფრო მაღალი ფასის წარმომდგენი სუბიექტები, რამაც ხელშეკრულებების ღირებულების გაზრდა გამოიწვია", - ვკითხულობთ აუდიტის დასკვნაში.

მაგალითად, აუდიტის დასკვნაში ვკითხულობთ, მერიის 2015 წლის 3 თებერვლის ტენდერში, რომელითაც 72 ათას ლარად 9 ათასი ნერგის შეძენა იყო გადაწყვეტილი ყველაზე დაბალი ფასით (53,1 ათასი) შპს ლალიმ გაიმარჯვა. მან კომისიის მოთხოვნის მიუხედავად, ფასწარმოქმნის ცხრილი არ წარადგინა და დისკვალიფიკაცია მიანიჭეს. სწორედ ამ მიზეზით გაიმარჯვა მისმა კონკურენტმა - შპს მწვანე თბილისმა 67,8 ათასი ლარით.

აუდიტმა დოკუმენტები შეისწავლა და დაადგინა, რომ შპს ლალისა და შპს მწვანე თბილისის 100 პროცენტიანი წილების მფლობელები სხვადასხვა დროს ერთი კომპანიის დირექტორები იყვნენ. გარდა ამისა, გამოვლინდა, რომ ხელშეკრულების შესრულების პროცესში, შპს მწვანე თბილისმა შპს ლალის მფლობელისგან 9 000 ხიდან 8 073 შეიძინა.