არასამთავრობო ორგანიზაციები EMC და საია საქართველოს მთავრობას და ეკონომიკის სამინისტროს მოუწოდებენ დაუყოვნებლივ ეფექტიანი შრომის უსაფრთხოების კანონის ტექსტზე შეჯერდნენ. ორგანიზაციები მოითხოვენ:

  • საქართველოს მთავრობამ უმოკლეს ვადაში უზრუნველყოს კანონის პროექტის იმგვარ ტექსტზე შეჯერება, რაც სრულად გამორიცხავს სამუშაო ჯგუფში დამუშავებული ვერსიის დასუსტებას;
  • საქართველოს პარლამენტმა უმოკლეს ვადებში მიიღოს კანონი შრომის უსაფრთხოების შესახებ, რომელიც რეალურად უპასუხებს ქვეყანაში შრომის უსაფრთხოების კუთხით არსებულ გამოწვევებს;
  • საქართველოს პარლამენტის თავმჯდომარემ და პარლამენტის ჯანმრთელობის დაცვისა და სოციალურ საკითხთა კომიტეტმა ცხადად დააფიქსირეს საკუთარი მზადყოფნა მაქსიმალურად შემჭიდროვებულ ვადებში – თვის ბოლომდე დაამტკიცონ კანონი.

გუშინ, 5 თებერვალს ჯანმრთელობის დაცვისა და სოციალურ საკითხთა კომიტეტს მეორე მოსმენით უნდა განეხილა შრომის უსაფრთხოების შესახებ კანონის პროექტი. საქართველოს მთავრობამ არ წარადგინა საკანონმდებლო პაკეტი განხილვისათვის და შიდაუწყებრივი პოზიციების შეჯერებისათვის დამატებითი ერთი კვირა ითხოვა.

საკომიტეტო მოსმენას არ ესწრებოდნენ ეკონომიკისა და მდგრადი განვითარების სამინისტროს წარმომადგენლები. პროცესი ამავე სამინისტროს მიზეზით 2017 წლის დეკემბერშიც გაჭიანურდა.

EMC-ისა და საიას განცხადებით, განვითარებული პროცესები ცხადყოფს, რომ სახელმწიფოს შესაბამისი უწყებების მხრიდან არ არსებობს ცხადი პოლიტიკური ნება რეალურად გადაჭრას დასაქმებულთა შრომის უსაფრთხოებისა და ჯანმრთელობის საკითხები.

შრომის უსაფრთხოების წესების დარღვევისთის, საკანონმდებლო ცვლილებით, უნდა განისაზღვროს პასუხისმგებლობის ფორმები დამსაქმებლის მიმართ. კანონპროექტის ამჟამინდელი რედაქციით, მისი მოქმედება მძიმე, მავნე და საშიშპირობებიან სამუშაოებზე გავრცელდება, ჩამონათვალს კი კანონის ამოქმედებიდან 6 თვის ვადაში განსაზღვრავს საქართველოს მთავრობა.

კანონპროექტის პირველი მოსმენით მიღების შემდეგ, განხილვები სამუშაო ჯგუფის ფორმატში გაგრძელდა. უწყებებს შორის მიმდინარე 5-თვიანი სამუშაო პროცესი, ჯანდაცვისა და ეკონომიკის სამინისტროებს შორის შეთანხმების ეტაპზეა.

ამავე თემაზე წაიკითხეთ: სად გადის ზღვარი ბიზნესის ინტერესსა და შრომით უფლებებს შორის