პარლამენტის იურიდიული კომიტეტის თავმჯდომარე ეკა ბესელია მუსტაფა ემრე ჩაბუქის საქმეს ეხმიანება და ამბობს, რომ მსგავსი საქმეები განზოგადებულია ქვეყნისთვის და ერთგვარ ტესტს წარმოადგენს:

"მნიშვნელოვანია, ადამიანის უფლებათა დაცვის ევროპული კონვენციითა და ქვეყნის ძირითადი კანონის, კონსტიტუციის შესაბამისად გადაწყდეს საკითხი".

თბილისის საქალაქო სასამართლოში ჩაბუქის რვათვიანი წინასაექსტრადიციო პატიმრობის საქმეს განიხილავენ.

მუსტაფა ემრე ჩაბუქი თურქეთის მხარის მოთხოვნით საქართველოში 24 მაისს დააკავეს. 7 ივლისს ცნობილი გახდა, რომ საქართველომ ჩაბუქს ლტოლვილის სტატუსის მინიჭებაზე უარი უთხრა. ლტოლვილის სტატუსი მიღების შემთხვევაში მისი თურქეთში ექსტრადიცია აღარ მოხდებოდა.

23 აგვისტოს კი თბილისის საქალაქო სასამართლომ მუსტაფა ჩაბუქს წინასაექსტრადიციო პატიმრობა შეუფარდა. პატიმრობის ვადა მას 23 თებერვალს ეწურება.