ტელეკომპანიები რუსთავი 2 და იმედი სარეკლამო დროს ერთად პირველი თებერვლიდან აღარ ყიდიან. ამის შესახებ On.ge-ს შპს ინტერ მედიას ერთ-ერთმა მფლობელმა ზურაბ გუმბარიძემ განუცხადა.

მისი თქმით, ტელეკომპანია იმედი თავის არხების, GDS-ისა და მაესტროს სარეკლამო დროების გაყიდვას გეგმავს.

კითხვაზე, იქონიებს თუ არა რუსთავი 2-ისა და მისი არხების მარაოსა და კომედი არხის შემოსავლებზე ეს ცვლილებები, გუმბარიძე ასე პასუხობს:

"ბოლო სამი წელია სარეკლამო ბაზარი მცირდება და არის დიდი ალბათობა იმის, რომ ეს ტანდენაცია გაგრძელდეს, არც დიდ ზრდას და არც დიდ კლებას წელს არ ველოდებით", - ამბობს გუმბარიძე.

მას შემდეგ, რაც ორ ძირითად არხს შორის შეთანხმება ვერ შედგა საჯარო რეესტრში კიდევ ერთი ახალი კომპანია დარეგისტრირდა, ისევ შპს ინტერ მედიას სახელით. სწორედ ეს ახალი კომპანია გაყიდის რუსთავი 2-ის სარეკლამო დროს.

გაყიდის თუ არა რომელიმე არხთან ერთად სარეკლამო დროს კავკასია, ამის შესახებ გადაწყვეტილება ტელეკომპანიის დირექტორს, ნინო ჯანგირაშვილს ჯერ არ მიუღია.

2017 წლის 16 იანვრიდან რვა ტელეკომპანიის სარეკლამო დროს ერთი კომპანია - შპს ინტერ მედია ყიდდა. აღნიშნული სარეკლამო კომპანია რვა ტელევიზიიდან ექვსი ტელევიზიის - რუსთავი 2, იმედი, მაესტრო, GDS, მარაო და კომედი არხი - სარეკლამო დროს სრულად ყიდდა, ტვ პირველისა და კავკასიის შემთხვევაში კი - ნაწილობრივ.