სახელმწიფო აუდიტის სამსახურის დასკვნის მიხედვით, 2015-2016 წლებში მაუწყებლობის შესახებ კანონს საზოგადოებრივი მაუწყებლის 103 თანამშრომელი არღვევდა. აუდიტის სამსახურის ინფორმაციით, ეს ადამიანები პარალელურად სხვა მაუწყებლებში მუშაობდნენ.

On.ge-სთან საუბრისას საზოგადოებრივი მაუწყებლის მაშინდელი გენერალური დირექტორი, გიორგი ბარათაშვილი ამბობს, რომ მისთვის აღნიშნული ფაქტების შესახებ ცნობილი არ იყო.

"ჩვენ ვერ გადავამოწმებდით მაგ ამბავს. ჩვენ გაგზავნილი გქვოდა [წერილი თანამშროლებთან], ყველას უნდა მოეტანა ინფორმაცია თუ სადმე მუშაობდა", - ამბობს ბარათაშვილი.

მაუწყებლის თანამშრომლების ინტერესთან კონფლიქტის შესახებ მაუწყებლობის შესახებ კანონში ცალკე მუხლია. ამ კანონის 23-ე მუხლის (მეექვსე პუნქტი) მიხედვით, საზოგადოებრივი მაუწყებლის თანამშრომელს არა აქვს უფლება, ეკავოს თანამდებობა ან ასრულებდეს ანაზღაურებად სამუშაოს სხვა მაუწყებელთან.