ბრალდებულ თამაზ ქვლივიძის ადვოკატმა ზაზა მესხმა, მოგვიანებით, ჟურნალისტებთან საუბრისას აქციების დაანონსება უარყო და განაცხადა, რომ "აქციებით მუქარა მისი საქმე არ არის". ზაზა მესხის თქმით, მისი საქმე მხოლოდ სამართლებრივად მუშაობაა.

კლუბ ბასიანის დაცვის დაჭრაში ბრალდებულის, თამაზ ქვლივიძის ადვოკატი, ზაზა მესხი აქციებს აანონსებს. ამის შესახებ მან თბილისის სააპელაციო სასამართლოს 17 იანვრის სხდომაზე განაცხადა, სადაც ქვლივიძისთვის აღკვეთის ღონისძიებად პატიმრობის შეფარდების საქმე განიხილებოდა.

სააპელაციო სასამართლომ გააუქმა საქალაქო სასამართლოს გადაწყვეტილება და ბრალდებულს, გირაოს ნაცვლად, პატიმრობა შეუფარდა.

ქვლივიძის ადვოკატი სასამართლოს გადაწყვეტილების გამოცხადებამდე აღნიშნავდა, რომ ბრალდებულის დაპატიმრების შემთხვევაში აქციებს გამართავდნენ. თბილისის სააპელაციო სასამართლომ თამაზ ქვლივიძის აღკვეთის ღონისძიებაზე გადაწყვეტილება რამდენიმე წუთის წინ გამოაცხადა.

ბასიანის წარმომადგენლის, ნაჯა ორაშვილის ინფორმაციით, მას შემდეგ, რაც 13 იანვარს თავდამსხმელი კლუბში არ შეუშვეს, მან კლუბის დაცვის უფროსს და დაცვის წევრებს რამდენიმე ჭრილობა მიაყენა. მისივე თქმით, ბრალდებულმა ჭრილობები მიაყენა დიდუბე-ჩუღურეთის სამმართველოს განყოფილების უფროსის მოადგილესაც.

15 იანვარს, კლუბ ბასიანის დაცვის წევრების დაჭრაში ბრალდებული თბილისის საქალაქო სასამართლომ 30 ათას ლარიანი გირაოს სანაცვლოდ გაათავისუფლა. პროკურატურა პირისთვის აღკვეთის ღონისძიებად პატიმრობას ითხოვდა და საჩივრით სააპელაციო სასამართლოს მიმართა.