საქართველოს პრეზიდენტის ადმინისტრაციის უფროსის, გიორგი აბაშიშვილის განცხადებით, იუსტიციის მინისტრმა მოქალაქეობის საკითხთა კომისიის განახლებული შემადგენლობა სამუშაო ადგილზე არ დაუშვა და სამინისტროს შენობიდან გამოასახლა. აბაშიშვილის თქმით კომისიის გაძლიერებამ და გამჭვირვალობის ზრდამ იუსტიციის მინისტრის გაუგებარი გაღიზიანება გამოიწვია:

"შესაბამისად, სრულიად მოულოდნელად განაწყენებულმა მინისტრმა კომისიის წევრები გამოასახლა იუსტიციის სამინისტროდან, იმ შენობიდან, სადაც წლების განმავლობაში, ფუნქციონირებდა ეს კომისია. შესაბამისად, დღეს კომისიის წევრები მოკლებულები არიან შესაძლებლობას განახორციელონ საკუთარი საქმიანობა.

მინდა, ყველას შევახსენო, რომ შენობა, საიდანაც ქალბატონმა მინისტრმა გამოასახლა კომისიის წევრები ეკუთვნის სახელმწიფოს და არა რომელიმე ერთ, კონკრეტულ მინისტრს.

ამავდროულად, იუსტიციის სამინისტრო განაგრძობს განაცხადების მიღებას, რაშიც მოქალაქეები ფულს იხდიან. ხოლო, თუ კომისიას არ მიეცემა საშუალება იმუშაოს, ეს ადამიანები ამ ფულს უბრალოდ დაკარგავენ.
ჩვენთვის სრულიად გაუგებარია ქალბატონი მინისტრის ასეთი პიროვნული ანგარიშწორება კომისიის მიმართ, მაგრამ ყველაზე მეტად გვაღელვებს იმ ასეულობით ადამიანის მდგომარეობა, რომლებიც მოკლებული არიან შესაძლებლობას მიიღონ საქართველოს მოქალაქეობა, შესაბამისად, ჩვენ ვაგრძელებთ მუშაობას ყველა სახელმწიფო ინსტიტუტთან, რათა ეს უსამართლობა დროულად აღმოიფხვრას"

2017 წლის 26 დეკემბერს, საქართველოს პრეზიდენტის ბრძანებულებით „საქართველოს მოქალაქეობის საკითხთა განხილვისა და გადაწყვეტის შესახებ“ დებულებაში ცვლილებები შევიდა. კერძოდ, გაიზარდა მოქალაქეობის საკითხთა კომისიის წევრების რაოდენობა, 4-ის ნაცვლად 6-მდე და კომისიის თავმჯდომარედ პრეზიდენტის ადმინისტრაციის წარმომადგენელი დაინიშნა. ამავდროულად, გაიზარდა საქართველოს სახელმწიფო უსაფრთხოების სამსახურის წარმომადგენელთა რიცხვი, რომელსაც კომისიაში ერთის ნაცვლად ორი წევრი ყავს. რაც შეეხება საქართველოს იუსტიციის სამინისტროს სსიპ სახელმწიფო სერვისების განვითარების სააგენტოს, ორის ნაცვლად ერთი წარმომადგენელი დარჩა.