უამინდობის გამო საგანგებო სიტუაციების მართვის ცენტრმა, 24 საათის განმავლობაში, 400-ზე მეტი შეტყობინება მიიღო. ამის შესახებ ინფორმაციას საგანგებო სიტუაციების მართვის სამსახური ავრცელებს.

"ყველა მათგანზე მყისიერი რეაგირება მოხდა. სამაშველო ოპერაციებში ჩართულია 100-მდე მეხანძრე-მაშველი", - აცხადებენ უწყებაში.

მათივე ინფორმაციით, მათი თანამშრომლები შიდა ქართლის რეგიონში უხვი ნალექის შედეგად დატბორილი სახლებიდან და ეზოებიდან წყალს მთელი ღამის განმავლობაში ტუმბავდნენ. გარდა ამისა, ძლიერი ქარის შედეგად წაქცეული ხეებისგან გზებს თბილისში, რუსთავში, ხაშურში, სურამში, თელავსა და გურჯაანში წმენდნენ.

თბილისის მერმა, კახა კალაძემ, დღეს, 10 იანვარს მთავრობის სხდომაზე განაცხადა, რომ უამინდობის გამო მიყენებული ზიანი ანაზღაურდება.