ზამთრის ოლიმპიადაზე, რომელიც თებერვალში, სამხრეთ კორეის ქალაქ ფხენჩანში გაიმართება, ჩრდილოეთ კორეა სპორტსმენების, ჩინოვნიკების, ჟურნალისტებისა და გულშემატკივრებისგან შემდგარ დელეგაციას გაგზავნის. ამის შესახებ ჩრდილო და სამხრეთ კორეული დელეგაციების ოფიციალური შეხვედრის შემდეგ გახდა ცნობილი. უკანასკნელი ორი წლის განმავლობაში, ეს დელეგაციების პირველი შეხვედრა იყო.

მიღწეული შეთანხმების გარდა, სამხრეთ კორეა გამოვიდა ინიციატივით, მომხდარიყო ომის შემდეგ გაყოფილი ოჯახების შეხვედრა. ასევე, გაჟღერდა წინადადება, რომ ჩრდილო და სამხრეთ კორეელი სპორტსმენები ერთიანად წარდგენილიყვნენ ოლიმპიადის გახსნის ცერემონიაზე. აღნიშნულ შეთავაზეზებზე ფხენიანის პასუხი, ჯერჯერობით, უცნობია. ჩრდილო და სამხრეთ კორეელი სპორტსმენები ოლიმპიადის გახსნის ცერემონიაზე, ერთიანად, ბოლოს 2006 წლის ტურინის ზამთრის ოლიმპიადაზე წარდგნენ.

ჩრდილო კორეელი სპორტსმენების ოლიმპიადაზე გამგზავრების თემა კიმ ჩენ ინის საახალწლო მიმართვის შემდეგ გახდა აქტუალური. საახალწლო მიმართვაში კიმ ჩენ ინმა პირველად განაცხადა, რომ ოლიმპიური გუნდის გაგზავნა მის გეგმებში შედის. ამ განცხადების შემდეგ სეული გამოვიდა ინიციატივით, საკითხი უმაღლესი დონის შეხვედრებზე განხილულიყო თუმცა, ფხენიანი პროცესში მანამ არ ჩაერთო, სანამ აშშ-მ და სამხრეთ კორეამ დაგეგმილი საერთო სამხედრო წვრთნების თარიღი არ გადაწიეს.

საერთაშორისო ოლიმპიური კომიტეტი მიესალმება ჩრდილო კორეელი სპორტსმენების მონაწილეობას ოლიმპიადაში და მზადაა, მათ სრული მხარდაჭერა აღმოუჩინოს.

ურთიერთობები ჩრდილოეთ კორეასა და სამხრეთ კორეას შორის ბოლო ორი წლის განმვალობაში საგრძნობლად დაიძაბა. მოლაპარაკებების პროცესის შეჩერების მიზეზად ჩრდილო კორეის ბირთვული პროგრამა გახდა. ორი წლის წინ ბირთვული რაკეტების გამოცდის შემდეგ, სეულმა მიიღო გადაწყვეტილება, გამოსულიყო საერთო ეკონომიკური პროგრამიდან, რომელსაც კესონის რეგიონში ფხენიანთან ერთად აწარმოებდა. შედეგად, ფხენიანმა შეწყვიტა ყველანაირი კონქანტი სამხრეთ კორეასთან, მათ შორის, გაწყდა სატელეფონო კავშირიც.