საქართველოს ჯანდაცვის სამინისტროს სოციალური მომსახურების სააგენტო 2 წლის ბავშვისთვის სიგარეტის მოწევის საკითხს სწავლობს. ვიდეო, სადაც ჩანს, რომ არასრულწლოვანს სიგარეტს აწევინებენ ფეისბუკში რამდენიმე დღის წინ გავრცელდა.

როგორც საკითხზე მომუშავე სოციალური მუშაკი, ირმა ტყეშელაშვილი On.ge-ს უყვება, ის უკვე გაესაუბრა ბავშვის დედას, რომელმაც მათთან თანამშრომლობის სურვილი გამოხატა. ტყეშელაშვილი ამბობს, რომ ბავშვს ფიზიკური ძალადობის ნიშნები არ ეტყობა.

"აუცილებლად ვაგრძელებთ მუშაობს და თანდათან გამოიხატება დეტალები. რა თქმა უნდა, თვითონ გვეუბნებიან, რომ შემთხვევა ერთჯერადი იყო, მაგრამ მიგვაჩნია, რომ საკითხი საყურადღებოა და ოჯახთან მუშაობა უნდა გაგრძელდეს", - ამბობს სოციალური მუშაკი.

მისი თქმით, ბავშვის დედის მონაყოლის მიხედვით, შემთხვევა პირველ იანვარს მოხდა, პრობლემას აცნობიერებს და ნანობს:

"თვითონ [დედამ] მითხრა, რომ ვიდეო პირველად ნახა, არ იყო ოთახში, როცა იღებდნენ და არც ის იცოდა, რომ ეს ფაქტი მოხდა საერთოდ და გვეუბნება, რომ კარგი ხუმრობა არ არის".