ჰარვი ვაინშტაინის პრესსპიკერი განცხადებას ავრცელებს, სადაც ნათქვამია, რომ ვაინშტაინი მსახიობ სელმა ჰაიეკის ყველა ბრალდებას უარყოფს.

"ჰარვი ვაინშტაინისთვის სელმა ჰაიეკი უმაღლესი დონის მსახიობია და მოხარულია, რომ მასთან ერთად გამორჩეულ და საინტერესო პროექტებზე იმუშავა. ბედნიერია იმითაც, რომ ჰაიეკმა სწორედ იმ ფილმისთვის აიღო ოსკარი, რომელზეც თავად ჰარვი მუშობდა.

უნდა ითქვას ისიც, რომ ფრიდა კალოს როლით დაინტერესებული იყო ჯენიფერ ლოპესი, რომელიც იმ პერიოდში თავისი პოპულარობის პიკში იყო, თუმცა, ჰარვიმ ყველაფერი გააკეთა იმისთვის, რომ როლი სელმა ჰაიეკს მიღო.

რაც შეეხება ბრალდებებს, რომლებიც სელმამ დაასახელა, არც ერთი მათგანი სიმართლეს არ შეესაბამება. ჰარვი ვაინშტაინს არასდროს მოუთხოვია სელმა ჰაიეკისთვის სხვა ქალების მონაწილეობით ეროტიკულ სცენებში გადაღება, რამეთუ ის გადასაღებ მოედანზე არ იმყოფებოდა. რეჟისორმა თავად გამოთქვა სურვილი გადაეღო ასეთი ეპიზოდი, რადგან საყოველთაოდ ცნობილი ფაქტია, რომ ფრიდა კალო ბისექსუალი იყო." - ნათქვამია განცხადებაში.

ჰოლივუდის ვარსკვლავმა სელმა ჰაიეკმა New York Times-ში საკუთარი წერილი გამოაქვეყნა, რომელშიც ჰარვი ვაინშტეინის მხრიდან სექსუალურ შევიწროებაზე წერს და ამბობს, რომ ჰარვი წლების განმავლობაში მისი პირადი მონსტრიც იყო.

როგორც სელმა ყვება, ყველაფერი 2002 წელს დაიწყო, როდესაც მას ფილმში, Frida, იღებდნენ. კინოსურათში ჰაიეკი ლეგენდარული მექსიკელი მხატვრის ფრიდა კალოს როლს ასრულებდა და ოსკარიც დაიმსახურა.

მსახიობის თქმით, მას ხშირად უხდებოდა უარის თქმა ვაინშტაინის შეთავაზებაზე ერთად შხაპის მიღების, ორალური სექსის, მასაჟის და სექსის შესახებ.

ჰაიეკი იხსენებს იმასაც, რომ ჰარვი მას სხვა ქალთან ეროტიკულ სცენაში გადაღებას სთხოვდა, რის გამოც მსახიობს ნერვული შეტევა დაემართა. ჰაიეკის თქმით, მდგომარეობიდან გამოსვლაში მას კოლეგები და მეგობრები - ეშლი ჯადი, ედუარდ ნორტონი და ანტონიო ბანდერასი დაეხმარნენ.

ეშლი ჯადი, რომელიც ჰაიეკს ჰარვი ვაინშტაინის მხრიდან ზეწოლის შემდეგ მდგომარეობიდან გამოსვლაში ეხმარებოდა, იყო პირველი ვინც გაბედა და ჰარვის შესახებ ხმამაღლა დაიწყო საუბარი, სწორედ მისი დამსახურებით დასრულდა გავლენიანი პროდიუსერის კარიერა.

სელმა ჰაიეკი იხსენებს იმასაც, რომ ჰარვი ვაინშტაინი მას ერთხელ დაემუქრა და უთხრა, რომ მისი მოკვლა და გაქრობა არ გაუჭირდებოდა.

გაიგეთ მეტი: ჰარვი ვაინშტაინის საქმე.