57 მუსლიმური ქვეყნის ლიდერი მსოფლიოს პალესტინის სახელმწიფოსა და აღმოსავლეთ იერუსალიმის, როგორც მისი ოკუპირებული დედაქალაქის აღიარებისკენ მოუწოდებს.

BBC-ის ცნობით, ისლამური თანამშრომლობის ორგანიზაციის სამიტზე გაცხადდა, რომ ვაშინგტონის გადაწყვეტილება ახლო აღმოსავლეთში სამშვიდობო პროცესში მის მონაწილეობას გამორიცხავს.

პალესტინის პრეზიდენტის, მაჰმუდ აბასის თქმით, აშშ გაერომ უნდა ჩაანაცვლოს. მისივე თქმით, მიუღებელია აშშ დარჩეს შუამავლის როლში "მას შემდეგ, რაც ისრაელს მიანიჭა უპირატესობა."

იერუსალიმის სტატუსი ისრაელ-პალესტინის კონფლიქტის ცენტრშია მოქცეული. ქალაქში, განსაკუთრებით მისი აღმოსავლეთ ნაწილში, სამი რელიგიის, იუდაიზმის, ისლამისა და ქრისტიანობის წმინდა ადგილები მდებარეობს.

ტერიტორია 1967 წლის ახლო აღმოსავლეთის ომის შემდეგ ისრაელის მიერაა ოკუპირებული. პალესტინელები კი აღმოსავლეთ იერუსალიმს მათი მომავალი სახელმწიფოს დედაქალაქად მოიაზრებენ.

ისრაელის სუვერენიტეტი იერუსალიმზე საერთაშორისოდ არასდროს აღიარებულა. 6 დეკემბერს კი აშშ გახდა პირველი ქვეყანა, რომელმაც იერუსალიმი ისრაელის დედაქალაქად გამოაცხადა და პრეზიდენტმა ტრამპმა აშშ-ის საელჩოს თელ-ავივიდან იერუსალიმში გადატანაც დააანონსა.