აშშ-ს ელჩი საქართველოში, იან კელი აცხადებს, რომ არსებობს კითხვები, თუ როგორ გადმოკვეთეს შეიარაღებულმა პირებმა საქართველოს საზღვარი. მან ასევე აღნიშნა ისიც, რომ ისანში ჩატარებულ სპეცოპერაზიაზე დამატებით დეტალებს ელოდება სახელმწიფო უსაფრთხოების სამსახურისგან, სადაც დღეს ბრიფინგი გაიმართება.

იან კელის თქმით, FBI-ს ექსპერტები საქართველოში ჩამოვიდნენ და ეხმარებიან ქართველ სამართალდამცავებს გაბრიელ სალოსი ქუჩაზე ჩატარებულ სპეცოპერაციასთან დაკავშირებით.

სპეცოპერაცია ისანში

თბილისში, ისანში, ბერი გაბრიელ სალოსის ქუჩაზე, 21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი, ერთი კი დაკავებულია.

ისნის სპეცოპერაციის დროს დაკავებულს, დახურულ სხდომაზე, აღკვეთის ღონისძიებად პატიმრობა 24 ნოემბერს შეეფარდა. ბრალდებულის ადვოკატის, იმედა ქარქაშაძის თქმით, გადაწყეტილება მათ 27 ნოემბერს გაასაჩივრეს.

ტერორიზმში ბრალდებული პირის ვინაობას, მის სახელსა და გვარს არც მისი ადვოკატი და არც პროკურორები ამხელდნენ, თუმცა სააპელაციო სასამართლოს განცხადებით, დაკავებული საედ დუდაევია.