ფიფა-ს ანტიდისკრიმნაციის კონსულტანტები ფეხბურთის ლგბტ გულშემატკივრებს რუსეთში 2018 წელს გასამართ მსოფლიო ჩემპიონატთან დაკავშირებით აფრთხილებს, რომ ერთმანეთის მიმართ სითბოს გამოხატვის შემთხვევაში, ადგილობრივებმა, შესაძლოა, მათ მიმართ აგრესია გამოიჩინონ. ამის შესახებ ინფორმაციას NBCnews ავრცელებს.

რუსეთში ჰომოსექსუალობის დეკრიმინალიზება 1993 წელს მოხდა, თუმცა ჰომოფობიური განწყობები ბოლო პერიოდში განსაკუთრებით მომძლავრდა მას შემდეგ, რაც 2013 წელს მიიღეს კანონი, რომლის მიხევდითაც არასრულწლოვნებში "ლგბტ პროპაგანდა" აკრძალულია.

FARE (Football Against Racism in Europe, ფეხბურთი ევროპაში რასიზმის წინააღმდეგ) აპირებს, რომ ჩემპიონატის დაწყებამდე სახელმღვანელო მოამზადოს, რომელშიც შესაძლო საფრთხეები იქნება აღწერილი:

"სახელმძღვანელოში ჩვენ ვურჩევთ ლგბტ გულშემატკივრებს იყვნენ ფრთხილად ნებისმიერ ადგილას, სადაც ლგბტ თემს არ მიესალმებიან. ასევე, ახსნილი იქნება რუსეთში ლგბტ თემის მდგომარეობა და უფლებები. ჰომოსექსუალად ყოფნა დანაშაული არაა, თუმცა არსებობს კანონი "პროპაგანდის" შესახებ. თემთან დაკავშირებული საკითხები სახალხო დისკურსის ნაწილი არაა და ისინი იმალებიან".

FARE-ს თქმით, ისინი არ არიან დარწმუნებული რამდენად უსაფრთხო იქნება სტადიონზე ცისარტყელის დროშის გაშლა.