"ლუგანსკისა და დონეცკის ტერიტორიებს უნდა ჰქონდეთ სრული დამოუკიდებლობა უკრაინის სახელმწიფოს ფარგლებში. ჩვენ უნდა გავიაროთ კიევთან ურთიერთობის ეს ეტაპი, რათა ევროპული და მსოფლიო აღიარება მოვიპოვოთ," - ამის შესახებ, 4 ნოემბერს, ერთ-ერთი სეპარატისტული ტელევიზიის ეთერში ლუგანსკის ე.წ. საგარეო საქმეთა მინისტრმა, ვლადისლავ დეინეგომ ისაუბრა.

დეინეგოს აზრით, დღეს, დონეცკისა და ლუგანსკის ე.წ. სახალხო რესპუბლიკები მხოლოდ უკრაინის ნაწილი შეიძლება იყვნენ, რუსეთში ინტეგრაციასა ან/და დამოუკიდებლობაზე კი საუბარი ჯერ-ჯერობით ზედმეტია, რადგან საერთაშორისო საზოგადოება ამას მხარს არ დაუჭერს. მისივე თქმით, ის ამ პოზიციას არ ემხრობა, თუმცა სხვა მექანიზმს ვერ ხედავს.

დეინეგოს თქმით, დონეცკისა და ლუგანსკის ე.ს. რესპუბლიკები მთელ საერთაშორისო საზოგადოებას წინააღმდეგობას ვერ გაუწევენ:

"იმისთვის, რომ ჩვენი აზრი გაითვალისწინონ, სრულფასოვან დიალოგს უნდა მივაღწიოთ მათთან, ვისი აზრიც ჩვენთვის არსებითად მნიშვნელოვანია."