საქათველოს პარლამენტში ინიცირებული კანონპროექტის მიხედვით, მარტოხელა მშობლის სტატუსის შეწყვეტის საფუძველი ქორწინების ხელახალი რეგისტრაცია შეიძლება აღარ გახდეს.

სახალხო დამცველის მიერ მომზადებულ იქნა საკანონმდებლო წინადადება, რომელზე დაყრდნობითაც იურიდიულ საკითხთა კომიტეტმა მოამზადა კანონპროექტი. პროექტი საქართველოს სამოქალაქო კოდექსში ცვლილების შეტანას შეეხება.

ომბუდსმენი მიიჩნევს, რომ არასწორია, როდესაც მარტოხელა მშობელი ქორწინების რეგისტრაციისთანავე კარგავს კანონით გათვალისწინებულ შეღავათს, რადგან "დედინაცვლის/მამინაცვლის ინსტიტუტი ვერ უზრუნველყოფს" გერის სრულყოფილად ზრუნვის შესაძლებლობას ისე, როგორც ეს შვილის შემთხვევაში ხდება.

მარტოხელა მშობლის სტატუსის მქონე პირი სარგებლობს გარკვეული შეღავათებით. კერძოდ, საშემოსავლო გადასახადით არ იბეგრება წლიური 3000-ლარიანი შემოსავალი, სოციალურად დაუცველთა ბაზაში შეყვანის შემთხვევაში კი იღებს ყოველთვიურ შემწეობას. ქორწინების რეგისტრაციის შემთხვევაში კი მარტოხელა მშობელი ამ შეღავათებს კარგავს.

სახალხო დამცველს მიაჩნია, რომ თუ ქორწინებისთანავე მშობელს სტატუსი შეუწყდება, კანონით დაურეგულირებელი რჩება განქორწინების შემთხვევაში ბავშვზე ზრუნვის ტვირთის განაწილება, მარტოხელა მშობლის სტატუსის ხელახლა მიღება, საბავშვო ბაღში ან სკოლაში ბავშვის რეგისტრაციის, ბავშვის ჯანმრთელობის თაობაზე გადაწყვეტილების მიღებასთან დაკავშირებული საკითხები და სხვა.

მოქმედი რედაქციის მიხედვით, მარტოხელა მშობელი არის პირი, რომელსაც ჰყავს ქორწინების გარეშე დაბადებული 18 წლამდე ასაკის შვილი, თუ ბავშვის დაბადების მოწმობაში არ არის შეტანილი ჩანაწერი ბავშვის მეორე მშობლის შესახებ. აგრეთვე პირი, რომელსაც ჰყავს შვილად აყვანილი 18 წლამდე ასაკის ბავშვი და შვილად აყვანის მომენტში არ იყო რეგისტრირებულ ქორწინებაში. ამავე 1191-ე მუხლის თანახმად, მარტოხელა მშობლის სტატუსის გაუქმების საფუძველია პირის რეგისტრირებულ ქორწინებაში შესვლა.