საქართველოდან გაუჩინარებულ აზერბაიჯანელ ჟურნალისტს, აფგან მუხტარლის ბაქოს სასამართლომ შინა პატიმრობაზე უარი უთხრა. 7 ნოემბერს განხილული შუამდგომლობის შესახებ მუხტარლის ადვოკატმა, ელჩინ სადიგოვმა კავკაზკი უზელთან ისაუბრა.

მისი თქმით, გამოძიების დაწყებამდე მსგავსი შუამდგომლობა მეოთხედ გამოიყენეს.

"ამ დრომდე სასამართლოს არგუმენტი იყო, რომ აფგან მუხტარლის შეუძლია გავლენა მოახდინოს გამოძიების მიმდინარეობაზე. თუმცა ნათლად განმარტებული და დასაბუთებული არ ყოფილა რა გავლენა შეიძლება ჰქონდეს შინა პატიმრობის დროს შეზღუდული კონტაქტებით", - აღნიშნა მუხტარლის ადვოკატმა და დასძინა, რომ წინასწარი გამოძიება უკვე დასრულებულია და არგუმენტი საფუძველს მოკლებული.

ადვოკატი აღნიშნავს, რომ წინასწარი პატიმრობის ციხეში ავადმყოფი ადამიანის ყოფნა ადამიანის უფლებების დარღვევაა და ამას ადამიანის უფლებათა ევროპის სასამართლოში გაასაჩივრებენ.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.

მუხტარლის დაკავებიდან რამდენიმე კვირაში, აზერბაიჯანის მმართველი გუნდის პარლამენტარმა ელმან ნასიროვმა რადიო თავისუფლებასთან ინტერვიუში თქვა, რომ მუხტარლის დაკავება აზერბაიჯან-საქართველოს სპეცსამსახურების წარმატებული ოპერაცია იყო.

საქართველოს ხელისუფლებას ამ დრომდე არ მიუწოდებია ინფორმაცია საზოგადოებისთვის აფგან მუხტარლის საქმესთან დაკავშირებით მიმდინარე გამოძიებაზე.