საქართველოს პრეზიდენტის ადმინისტრაციის უფროსი გიორგი აბაშიშვილი უმრავლესობის მიერ ახალი საკონსტიტუციო ცვლილებების დაწყების პროცესს გამოეხმაურა და განაცხადა, რომ მმართველი პოლიტიკური გუნდის "მოქმედების ტენდენცია არ იცვლება". მისი თქმით, უმრავლესობა "ჯერ აგდებს პრეზიდენტის ვეტოს" და შემდგომ, რაც პრეზიდენტის ვეტოში წერია, სიტყვა-სიტყვით გადააქვს ახალ ინიციატივაში.

"ასეა ამ შემთხვევაშიც და ამის ზუსტი მაგალითია საქართველოს ეროვნული ბანკი - სულ ცოტა ხნის წინანდელი მაგალითი, როდესაც ჯერ პრეზიდენტის ვეტო ჩააგდეს და შემდგომ სიტყვა-სიტყვით გადაიწერა ახალ კანონპროექტში პრეზიდენტის ვეტოში დაფიქსირებული მოსაზრებები... როგორც ჩანს, მმართველი პოლიტიკური გუნდის მიზანი არის არა საკითხების კვალიფიციური ანალიზი და გათვალისწინება, არამედ მათი თვითმიზანი არის უბრალოდ ვეტოს დაძლევა", - განაცხადა გიორგი აბაშიშვილმა.

გუშინ, 30 ოქტომბერს, საქართველოს პარლამენტის თავმჯდომარემ, ირაკლი კობახიძემ განცხადა, რომ ინიცირებას უკეთებენ ახალ საკანონმდებლო ცვლილებებს, რომლებიც ახლად მიღებულ კონსტიტუციაში მხოლოდ ოთხ შესწორებას ითვალისწინებს. მისი თქმით, საქმე ეხება იმ საკითხებს, რომლებზეც ვენეციის კომისიასთან შეთანხმდნენ.

"საუბარია ბონუსის სისტემის გაუქმებაზე, კონსტიტუციიდან ამოღებაზე, ბლოკების ერთჯერადად დატოვებაზე. ზუსტდება რწმენის თავისუფლებასთან დაკავშირებით ჩანაწერი და ასევე ზუსტდება ჩანაწერი, რომელიც შეეხება საკონსტიტუციო სასამართლოს უფლებამოსილებებს არჩევნებთან დაკავშირებით. ეს არის ოთხი ცვლილება, რომელიც შევა კონსტიტუციაში", - განაცხადა კობახიძემ.

მისივე თქმით, შეიქმნება სპეციალური კომისია, რომელიც ერთი თვის განმავლობაში დაიწყებს მუშაობას, დეკემბერში იქნება ორი მოსმენა, ხოლო მესამე მარტში ჩატარდება.

მანამდე, 13 ოქტომბერს, ქართულმა ოცნებამ საქართველოს პრეზიდენტის მოტივირებული შენიშვნები არ გაითვალისწინა და კონსტიტუციის პროექტზე დადებული ვეტო დაძლია. კენჭისყრაში მონაწილეობა არ მიუღიათ ნაციონალურ მოძრაობასა და ევროპულ საქართველოს.

პრეზიდენტის თქმით, მოტივირებული ექვსი შენიშვნიდან პირველი ოთხი საკითხი არის ის ვალდებულებები, რომლებიც ქართულმა ოცნებამ ვენეციის კომისიისგან აიღო. ესენია: ბონუსის, ბლოკების, საკონსტიტუციო სასამართლოსა და აღმსარებლობის თავისუფლების საკითხები. მეხუთე საკითხი ეხება 2020 წელს პროპორციულ საარჩევნო სისტემაზე გადასვლას, ხოლო მეექვსე - პრეზიდენტის არჩევის წესს.

კანონპროექტის დამტკიცების შემდეგ, რამდენიმე დღეში, გიორგი მარგველაშვილმა, კონსტიტუციის ახალ პროექტს ხელი მოაწერა.