გუშინ, 27 ოქტომბერს, შახტაში კიდევ ერთი მუშის დაღუპვის საქმის მოკვლევის დროს მინდელის მაღაროში სამთო მასალა კვლავ ჩამოიშალა. ამის შესახებ შრომის პირობების ინსპექტირების დეპარტამენტის წარმომადგენელმა, ბექა ფერაძემ ჟურნალისტებს განუცხადა.

"პროცესი კიდევ მიმდინარეობს. ჩვენი მოკვლევის დროსაც მოხდა მცირეოდენი მასის ჩამოშლა. ეს ჩვენ გვიქმნის შეფერხებას, რომ სრულყოფილად მოვიკვლიოთ თუ რა მოხდა სამუშაო ადგილზე", - განაცხადა ტელეკომპანია იმედთან საუბრისას ფერაძემ.

ტექნიკური და სამშენებლო ზედამხედველობის სააგენტოს დირექტორის, გრიგოლ კაკაურიძის თქმით, ამ ეტაპზე კონკრეტული მიზეზების თქმა უჭირთ, რამაც მუშის გარდაცვალება გამოიწვია. მისი განმარტებით, მიზეზი მაშინ ეცოდინებათ, როცა შემთხვევის ადგილამდე მისვლას შეძლებენ.

საქმეზე შინაგან საქმეთა სამინისტრომ გამოძიება სისხლის სამართლის კოდექსის 240-ე მუხლით დაიწყო. ამ მუხლით პირს სისხლისსამართლებრივი პასუხისმგებლობა სამუშაოს წარმოებისას უსაფრთხოების წესის დარღვევისთვის ეკისრება.