24 ივნისს, ვენესუელაში ორმა ძლიერმა მიწისძვრამ სულ მცირე 32 ადამიანის სიცოცხლე შეიწირა, ხოლო 700-ზე მეტი დაშავდა. დედაქალაქ კარაკასსა და მის შემოგარენში ათობით შენობა ნანგრევებად იქცა. ინფორმაციას Reuters ავრცელებს.

აშშ-ის გეოლოგიური სამსახურის (USGS) მონაცემებით, თავდაპირველად 7.2 მაგნიტუდის სიმძლავრის მიწისძვრა კარაკასიდან დასავლეთით, დაახლოებით 160 კილომეტრში დაფიქსირდა, ხოლო ერთ წუთზე ნაკლებ დროში მას 7.5 მაგნიტუდის სიმძლავრის ბიძგები მოჰყვა.

USGS-ის პროგნოზირების მოდელზე დაყრდნობით, მსხვერპლის რაოდენობა, სავარაუდოდ, ათასებს მიაღწევს და არსებობს დიდი ალბათობა იმისა, რომ გარდაცვლილთა რიცხვმა 10 000-ს გადააჭარბოს.

ქვეყნის დროებითმა პრეზიდენტმა, დელსი როდრიგესმა განაცხადა, რომ პირველადი მონაცემები არ მოიცავს ყველაზე მეტად დაზარალებულ ლა-გუაირას. ეს რეგიონი კარაკასის მახლობლად მდებარეობს და იქ განთავსებულია ქალაქის აეროპორტი, რომელიც ამჟამად დაკეტილია.

"ათობით შენობა ჩამოინგრა და ამ წუთებში ინტენსიური სამაშველო სამუშაოები მიმდინარეობს, რათა იმდენი სიცოცხლე გადავარჩინოთ, რამდენის უფლებასაც ღმერთი მოგვცემს. ეს ნამდვილი ტრაგედიაა. სამძიმარს ვუცხადებ და სოლიდარობას ვუდასტურებ იმ ოჯახებს, რომლებმაც ამ მძიმე წუთებში საყვარელი ადამიანები დაკარგეს," — განაცხადა როდრიგესმა სახელმწიფო ტელევიზიით.

ქვეყნის ოპოზიციის ლიდერებმა, რომელთა უმეტესობაც ვენესუელის ფარგლებს გარეთ იმყოფება, პლატფორმა X-ზე გამოაქვეყნეს დაკარგულთა საძიებო ვებგვერდი. ადგილობრივი დროით ღამის 2 საათისთვის ამ საიტზე უკვე 6 600-ზე მეტი ადამიანი ირიცხებოდა უგზო-უკვლოდ დაკარგულად.

ბევრი ვენესუელელი მიწისძვრის მომენტში სახლში იმყოფებოდა, რადგან ქვეყანაში ოფიციალური უქმე დღე იყო.

განმეორებითი ბიძგები ვენესუელის დედაქალაქში ხუთშაბათს, 25 ივნისს, გამთენიისასაც გრძელდებოდა.

დელსი როდრიგესის თქმით, ქვეყანა ამჟამად სრულად არის ფოკუსირებული სამაშველო ოპერაციებზე და უახლოეს საათებში სხვადასხვა ქვეყნიდან მაშველთა ჯგუფებს ელოდება. მან მადლობა გადაუხადა მსოფლიო ლიდერებს, მათ შორის აშშ-ის პრეზიდენტ დონალდ ტრამპს.

ტრამპმა სოციალურ ქსელში დაწერა, რომ ამერიკის შეერთებული შტატები მზად არის ყველანაირად დაეხმაროს ვენესუელას ამ კატასტროფის დასაძლევად.

"ორი ძლიერი მიწისძვრა, რომელიც თავს დაატყდა ვენესუელელ ხალხს, მასშტაბურია და მას დამანგრეველი მსხვერპლი მოჰყვა," – განაცხადა ტრამპმა, რომლის ბრძანებითაც იანვარში, სპეცოპერაციის შედეგად, ვენესუელის პრეზიდენტი ნიკოლას მადურო დააკავეს.