აშშ-ის პრეზიდენტის ჯონ ფიცჯერალდ კენედის მკვლელობის შემდეგ 50 წელზე მეტი გავიდა. 26 ოქტომბერს კი ამერიკის მოქალაქეებს საშუალება ექნებათ, პრეზიდენტის მკვლელობისა და გამოძიების სახელმწიფო ანგარიში წაიკითხონ.

ეს კი იმ შემთხვევაში მოხდება, თუ ამჟამინდელმა პრეზიდენტმა დონალდ ტრამპმა არაფერი მოიმოქმედა.

ჯონ და ჟაკლინ კენედები

ფოტო: Getty

თეთრ სახლს ოფიციალური განცხადება ჯერ კიდევ არ გაუვრცელებია საკითხთან დაკავშირებით, კონკრეტულად, ტრამპი მთელი საქმის გამოქვეყნებას დაუჭერს მხარს, თუ რამდენიმე დოკუმენტს ისევ საიდუმლოდ დატოვებს.

როგორც ცნობილია, აშშ-ის დაზვერვის წარმომადგენლები მისგან სწორედ საქმის მასალების კვლავ საიდუმლოდ დატოვებას ითხოვენ. დოკუმენტების მცირე ნაწილის შენახვაც კი შეთქმულების თეორეტიკოსებს პრეტენზიის გამოთქმის საბაბს მისცემს.

ოთხშაბათს დონალდ ტრამპმა კიდევ ერთხელ დააანონსა დოკუმენტების გასაჯაროება, მაგრამ არ უხსენებია, ეს სრულად მოხდება თუ არა. შაბათს ტვიტერზე მან დაწერა, რომ დოკუმენტების გასაჯაროებას "დამატებითი ინფორმაციის მიწოდების" შემთხვევაში დაუშვებდა.

ჯონ კენედის მკვლელობის საქმის მასალების კანონის მიხედვით, რომელიც 1992 წელს მიიღეს, დონალდ ტრამპს შეუძლია დოკუმენტების გასაჯაროება დაბლოკოს, თუ მიიჩნია, რომ ეს გარკვეულ საფრთხეს წარმოადგენს სამხედრო თავდაცვის, სადაზვერვო ოპერაციის, სამართალდამცავების ან/და საერთაშორისო ურთიერთობებისთვის, ასევე თუ მოსალოდნელმა ზიანმა საზოგადობრივი ინტერესი გადაწონა.

დოკუმენტების გამოქვეყნების ვადა კანონის მიღებიდან 25 წელიწადში იწურება. კანონი ითვალისწინებს კენედის მკვლელობასთან დაკავშირებული ყველა სახელმწიფო დოკუმენტის გასაჯაროებას.

ისტორიკოსები, რომლებმაც კენედის მკვლელობას სწავლობენ, არ ელოდებიან, რომ რაიმე საოცარი ფაქტი გახდება ცნობილი ან პრეზიდენტის მკვლელობაში ლი ჰარვი ოსვალდის მონაწილეობა არ დადასტურდება. თუმცა, ეს მასალები ამერიკელებს საშუალებას მისცემს, შედარებით ფართედ შეხედონ აშშ-ის 35-ე პრეზიდენტის მკვლელობის დეტალებსა და შემდგომ გამოძიებას.

ლი ჰარვი ოსვალდი

ფოტო: AP

"ვინც ფიქრობს, რომ ეს საქმეს ამოაყირავებს და გვაჩვენებს, რომ Dealey Plaza-ში სამი ან ოთხი მსროლელი იყო, ეს ასე არაა", - CNN-თან საუბრისას განაცხადა ჯერალდ პოსნერმა, რომელმაც დაწერა წიგნი "საქმე დახურულია: ლი ჰარვი ოსვალდი და ჯფკ-ს მკვლელობა".

"ოსვალდმა ეს მარტომ გააკეთა, მაგრამ რას აკეთებს ეს მასალები და რატომ არის მათი გასაჯაროება მნიშვნელოვანი, არის ის, რომ ისინი საქმის ისტორიას შეავსებენ და გვაჩვენებენ, ცენტრალური სადაზვერვო სააგენტომ (CIA) და საგამოძიებო ბიურომ (FBI) არაერთხელ როგორ დაფარეს სამხილები", - ამბობს პოსნერი.

დოკუმენტების გასაჯაროებამ, შეიძლება, ნათელი მოჰფინოს ოსვალდის საიდუმლო მოგზაურობას მეხიკოში, რომელიც მკვლელობამდე რამდენიმე კვირით ადრე იყო. ასევე, შესაძლოა, რომ მასალებში აშშ-ის მიერ კუბის პრეზიდენტის, ფიდელ კასტროს მკვლელობის მცდელობის ახალი დეტალებიც აღმოჩნდეს.

რესპუბლიკელების ნაწილმა ტრამპი წაახალისა, რომ სრულად გამოაქვეყნოს საიდუმლო დოკუმენტები.

"დაფარვის არანაირი მიზეზი აღარ არსებობს", - ტვიტერზე წერს მართლმსაჯულების კომიტეტის თავმჯდომარე ჩაკ გრასელი, "დროა, ამერიკელმა ხალხმა და ისტორიკოსებმა დასკვნები გამოიტანონ".

პრეზიდენტის პოლიტიკურმა მრჩეველმა, კენედის მკვლელობის შეთქმულების კრიტიკოსმა, როჯერ სტოუნმა, პირადად მოუწოდა ტრამპს, რომ ყველა დოკუმენტის გასაჯაროების ბრძანება გასცეს.