ზურაბ პატარაძის 26 წლის შვილი, რევაზ პატარაძე, საზღვაო ტრანსპორტის სააგენტოს დირექტორის მოადგილედ დაინიშნა. ამის შესახებ ინფორმაციას "ბათუმელები" ავრცელებს.

მათი ცნობით, მისი დაწინაურება დროში ემთხვევა აჭარაში ზურაბ პატარაძის მთავრობის თავმჯდომარედ დაბრუნებას: რევაზ პატარაძე საზღვაო ტრანსპორტის სააგენტოს დირექტორის მოადგილედ 2026 წლის 6 აპრილს დანიშნეს, მამამისი, ზურაბ პატარაძე აჭარაში მთავრობის თავმჯდომარედ კი 2026 წლის 22 აპრილს დაბრუნდა.

"ბათუმელებისვე" ცნობით, საზღვაო ტრანსპორტის სააგენტოს დირექტორის მოადგილის ხელფასი 9 320 ლარია. სააგენტოს დირექტორი ივანე აბაშიძეა. მანამდე, 2023-2025 წლებში, ამ პოსტს ალექსანდრე ახვლედიანი იკავებდა. მან თანამდებობა მას შემდეგ დატოვა, რაც გამოძიების ვერსიით, მის სახლში სცადა თვითმკვლელობა აჭარის მთავრობის ყოფილმა თავმჯდომარემ, თორნიკე რიჟვაძემ.

რევაზ პატარაძემ კარიერა 2021 წელს, ბაქოს საერთაშორისო პორტში დაიწყო და იქ მუშაობდა 2023 წლის ჩათვლით საოპერაციო დეპარტამენტის წამყვან სპეციალისტად, შემდეგი ორი წელი მაგისტრატურა გაიარა შვედეთში, მალმეს უნივერსიტეტში. 2025 წელს საქართველოში დაბრუნდა და ანაკლიის საზღვაო ნავსადგურის დირექტორის მრჩევლად დაინიშნა.

ოფიციალური ბიოგრაფიის მიხედვით, რევაზ პატარაძე საზღვაო ტრანსპორტის სააგენტოში სამუშაოდ 2025 წელს მივიდა. 2025 წლიდან 2026 წლის 6 აპრილამდე ის საზღვაო ტრანსპორტის სააგენტოში მუშაობდა შუა დერეფნის სატრანსპორტო დერეფნების განვითარების მენეჯერად, — წერს "ბათუმელები".