თამაზ მეჭიაურმა, სასამართლოს გადაწყვეტილების გამოცხადების შემდეგ, რომლის თანახმად ის თიანეთის მერი ხდება, ჟურნალისტებს განუცხადა, რომ პროკურატურას მსგავსი ფაქტების შესწავლისკენ მოუწოდებს:

"სასამართლომ აღიარა ის დანაშაულებრივი შეცდომა, რაც დაუშვა საოლქო საარჩევნო კომისიამ და მე აქვე მინდა ვთქვა, მიუხედავად იმისა რომ გადაწყვეტილებით კმაყოფილი ვარ, მე შევუერთდები საიას მიმართვას და ვთხოვ პროკურატურას შეისწავლოს ის საკითხი, რამეთუ ასეთი ფაქტები აღარ შეიძლება განმეორდეს".

მცხეთის რაიონულმა სასამართლომ გადაწყვეტილება სასამართლოში რამდენიმე წუთის წინ გამოაცხადა და გააუქმა გადაწყვეტილება ხუთი სადავო ბიულეტინის ვარგისად ცნობაზე.

ცესკოს წინასწარი მონაცემებით, თამაზ მეჭიაური კონკურენტ ლელა ქიტესაშვილს, რომელიც ქართული ოცნების კანდიდატი იყო, არჩევნებს ერთი ხმით უგებდა, თუმცა, საოლქო კომისიამ გაბათილებული ხუთი ბიულეტენი ვარგისად მიიჩნია. შედეგად, ლელა ქიტესაშვილს 3 081 ხმა მიაკუთვნა, მეჭიაურს კი - 3 078.