თბილისში, რუსთაველის გამზირის რეაბილიტაციის მიზნით, უახლოეს პერიოდში ახალი ტენდერი გამოცხადდება. ამის შესახებ თბილისის ვიცე-მერმა გიორგი ტყემალაძემ სამთავრობო ტელეკომპანია "რუსთავი 2"-ის გადაცემა "დებატებში" განაცხადა.

მისი თქმით, რუსთაველის გამზირის რეაბილიტაცია დედაქალაქისთვის ერთ-ერთი უმნიშვნელოვანესი პროექტია — გამზირის განსაკუთრებული ისტორიულ-კულტურული დატვირთვიდან გამომდინარე.

"რუსთაველის გამზირს თავისი ისტორიული არეალებით და ძეგლებით მეტი დატვირთვა აქვს, ჩვენი ქალაქის გულია. შესაბამისად, ჩვენ ძალიან აქტიურად ვთანამშრომლობთ ცენტრალურ მთავრობასთან და განხორციელდა ბაზრის სიღრმისეული კვლევა, სამშენებლო რესურსების, მასალების, ზედნადები ხარჯების და ა.შ. უახლოეს პერიოდში გვექნება შესაძლებლობა, გამოვაცხადოთ ახალი ტენდერი და დარწმუნებულები ვართ, მაღალი კონკურენცია იქნება. უახლოეს პერიოდში გვექნება შესაძლებლობა დავიწყოთ რუსთაველის გამზირის რეაბილიტაცია, რომელიც, დაახლოებით, 4 თვის განმავლობაში გაგრძელდება", — განაცხადა გიორგი ტყემალაძემ.

ვიცე-მერის განმარტებით, პროექტი გზის საფარის განახლებასთან ერთად, მასშტაბურ ინფრასტრუქტურულ სამუშაოებს ითვალისწინებს.

როგორც გიორგი ტყემალაძემ აღნიშნა, რეაბილიტაციის ფარგლებში შეიცვლება მიწისქვეშა კომუნიკაციები, რომლებიც ათწლეულების განმავლობაში არ განახლებულა. მისი თქმით, პროცესი კომპლექსურია და სხვადასხვა უწყებასა და პროვაიდერ კომპანიასთან კოორდინაციით განხორციელდება.

"ეს არის კომპლექსური პროცესი, GWP-თან და სხვა პროვაიდერ კომპანიებთან ერთად. ამ ყველა დაგეგმილ სამუშაოს აუცილებლად შევასრულებთ, რუსთაველის გამზირის რეაბილიტაციაც იქნება განხორციელებული და მინდა გითხრათ, რომ ძალიან მნიშვნელოვანი სიურპრიზები გვექნება, ზოგადად, მომავალში დაგეგმარებასთან დაკავშირებით", — აღნიშნა მან.

თბილისის მერიის ინფორმაციით, რუსთაველის გამზირის რეაბილიტაცია ახალი ტენდერის გამოცხადებისა და გამარჯვებული კომპანიის გამოვლენის შემდეგ დაიწყება და, სავარაუდოდ, დაახლოებით ოთხ თვეს გასტანს.