გორში სამართალდამცავების მხრიდან ფიზიკური ძალადობის მსხვერპლმა, პაპუნა ლოცულაშვილმა "ვივამედის" კლინიკა უკვე დატოვა. სამედიცინო დაწესებულების კლინიკური დირექტორის, ზურაბ ჩხაიძის თქმით, პაციენტს ნეკნი ჰქონდა მოტეხილი.

" მისი ჩივილებიდან გამომდინარე კონსულტირებული იქნა სხვადასხვა სპეციალისტების მიერ. მათ შორის ქირურგი, ტრავმატოლოგი, ნევროლოგი. ყველა ექიმ-კონსულტანტმა ნახა პაციენტი, კონსულტირებულია. შესაბამისად არსებობს შესაბამისი ჩანაწერი. პაციენტის ზოგადი მდგომარეობა შეფასდა დამაკმაყოფილებლად. ექიმი-სპეციალისტების გადაწყვეტილებით არ ესაჭიროებოდა მას სტაციონარულ პირობებში მკურნალობა. კონსულტაციების და შესაბამისი რეკომენდაციების საფუძველზე პაციენტმა დატოვა კლინიკა.

[ლოცულაშვილის ნეკნის მოტეხილობა] ტრავმატოლოგის კონსულტაციაშიც აღნიშნულია", — განაცხადა ზურაბ ჩხაიძემ (კომენტარს "ტვ პირველი" ავრცელებს).

პაპუნა ლოცულაშვილი თავდაპირველად სისხლის სამართლის კოდექსის 353-ე მუხლით იყო დაკავებული, რაც პოლიციის თანამშრომლისთვის წინააღმდეგობის გაწევას გულისხმობს ძალადობის მუქარით, მისი სამსახურებრივი საქმიანობის შეწყვეტის მიზნით.

შეგახსენებთ, გუშინ 27 მაისს, "ქართლის ამბებმა" გაავრცელა ვიდეო, სადაც ჩანს როგორ ძალადობს ფიზიკურად 10-მდე სამართალდამცავი ახალგაზრდა კაცზე.აღნიშნულ ფაქტზე პროკურატურამ პოლიციელთა მხრიდან სამსახურებრივი უფლებამოსილების სავარაუდო ძალადობით გადამეტების მუხლით გამოძიება უკვე დაიწყო.