ინიციატივა "ჯერ საქართველოს" თანადამფუძნებელმა, ნიკოლოზ ხატიაშვილმა პრაღაში გამართულ გლობალური უსაფრთხოების ფორუმში მიიღო მონაწილეობა. ვიზიტის ფარგლებში ხატიაშვილმა 30-მდე სამუშაო შეხვედრა გამართა პარტნიორი ქვეყნების პრეზიდენტებთან და სხვადასხვა სახელისუფლო რგოლის წარმომადგენლებთან.

როგორც ორგანიზაციის თანადამფუძნებელი აღნიშნავს, საერთაშორისო ასპარეზზე ქართული ახალი პოლიტიკური ძალების მიმართ ინტერესი დიდია.

"არსებობს დიდი ინტერესი და იმედი საქართველოში ახალი პოლიტიკური ძალების, მათ შორის "ჯერ საქართველოს" მიმართ. ევროპელი პარტნიორები ხედავენ საქართველოს მნიშვნელობას, განსაკუთრებით ერთიანი ევროპული უსაფრთხოების კონტექსტში და მზად არიან მხარი დაუჭირონ მას ყველა მიმართულებით, როდესაც ქვეყანა გამოვა არსებული პოლიტიკური კრიზისიდან და დაუბრუნდება დემოკრატიულ ჩარჩოს", — აცხადებს ნიკოლოზ ხატიაშვილი.

ფორუმის ფარგლებში განსაკუთრებით მნიშვნელოვანი შეხვედრა უნგრულ მხარესთან შედგა. ნიკოლოზ ხატიაშვილი უნგრეთის პარლამენტის საგარეო საქმეთა კომიტეტის თავმჯდომარეს, მარტონ ჰაიდუს შეხვდა. მხარეები შეთანხმდნენ, რომ უახლოეს მომავალში აქტიური მუშაობა დაიწყება ინიციატივა "ჯერ საქართველოსა" და უნგრეთის მმართველ პარტია ტისას (Tisza) შორის ორმხრივი ურთიერთობების გაღრმავების მიმართულებით.