სამოქალაქო მოძრაობა პარტიზანული მებაღეები თბილისის ახლადარჩეულ მერთან, კახა კალაძესთან "კონსტრუქციული თანამშრომლობის" სურვილს გამოთქვამენ და მზად არიან აქტიურად ჩაერთონ ეკოლოგიისა და გამწვანების საქალაქო სამსახურის მუშაობაში. ამის შესახებ მოძრაობა ფეისბუქის საკუთარ გვერდზე ავრცელებს განცხადებას:

"ვფიქრობთ, ამგვარი ურთიერთობის პრეცედენტი დადებითად აისახება ქალაქის გონივრულ განვითარებაზე".

ცესკოს შედეგების გამოქვეყნების შემდეგ, კახა კალაძემ განაცხადა, რომ მერიის კარი ღია იქნება "თბილისის თითოეული გულშემატკივრისთვის":

"მართლაც, თუ მათ [ოპოზიციას] გააჩნიათ კონკრეტული ხედვები, იდეები, კონკრეტული პროექტები თბილისთან დაკავშირებით, კიდევ ერთხელ გულწრფელად ვამბობ, რომ მზად ვარ თანამშრომლობისთვის..."

ცენტრალური საარჩევნო კომისიის წინასწარი მონაცემების მიხედვით, ადგილობრივი თვითმმართველობის არჩევნებში, ქართული ოცნების კანდიდატმა კახა კალაძემ ხმების 51,12%-ის მიღების შედეგად გაიმარჯვა. მეორე ადგილზე დამოუკიდებელი კანდიდატი ალეკო ელისაშვილი გავიდა 17,49%-ით, ხოლო ენმ-ს კანდიდატმა ზალიკო უდუმაშვილმა 16,55% დააგროვა.