6-წლიანი მრავალფეროვანი კარიერა თიბისიში

უკვე მე-6 წელი დაიწყო, რაც თიბისიში ვარ. თავიდან კომპანიაში როგორც სტაჟიორი ისე მოვედი და ციფრული ბანკინგის მიმართულებით დავიწყე მუშაობა. მაშინ, ზოგადად, პროდუქტის შექმნა მაინტერესებდა. ვიფიქრე, რომ ეს სტაჟირება ძალიან კარგი შესაძლებლობა იქნებოდა ჩემთვის.

ამ 6 წლის განმავლობაში თიბისიშივე შევიცვალე რამდენიმე პოზიცია. გარკვეული პერიოდი მობაილბანკის პროდუქტების განვითარებაზე ვმუშაობდი; შემდეგ მომხმარებლის გამოცდილების გუნდში ვიყავი; ამის მერე კი, უკვე ინვესტიციების მიმართულებით გადმოვედი.

ინვესტიციები ყოველთვის მაინტერესებდა. როცა ბანკის ფოკუსი ინვესტიციების შემოტანა გახდა, აქეთ გადმოსვლის ინიციატივა თავად გამოვთქვი, თან აქციებით ვაჭრობა და სხვა საკითხებიც მესმოდა. ახლა ინვესტიციების ბიზნესის პროდუქტის მფლობელი ვარ, პროდუქტის განვითარება მაქვს ჩაბარებული და ამაში დიდია თიბისიში ჩემი მენეჯერების წვლილი, რადგან ყველანაირად შემიწყვეს ხელი, რომ იქ ვყოფილიყავი, სადაც ვარ.

ინვესტიციები და საქართველო

ჩემი ახლანდელი საქმიანობა მობაილბანკის ინვესტიციების პლატფორმის გაძლიერებაზე ზრუნვაა; ასევე იმაზე, რომ სასურველი ბიზნესშედეგები დაიდოს.

ამ მიმართულებით საკმაოდ დიდი მოთხოვნაა, რაც, ჩემი აზრით, იმანაც განაპირობა, რომ ქართულ ბაზარზე ინვესტიციების პოპულარობა ძალიან გაიზარდა. ჩვენი პროდუქტი 2023-ში გაეშვა; ამის შემდეგ საცალო სეგმენტში საკმაოდ პოპულარულები გავხდით და ინვესტიციების შესახებ თიბისისგან უკვე ძალიან ბევრმა მომხმარებელმა გაიგო. ბევრ ადამიანს საინვესტიციო პორტფელიც აქვს. აქციებისა და ფონდების ფლობა უფრო დემოკრატიული გახდა. ამ ყველაფერზე საუკეთესოდ მეტყველებს ციფრები — 2025 წელს, ჩვენი აქტიური კლიენტების რაოდენობა გავაორმაგეთ და წელი 113 ათასი აქტიური მომხმარებლით დავხურეთ.

ამ ამბის ლოგიკური გაგრძელება იყო, რომ თიბისიში წელს უკვე კრიპტოს მიმართულებაც დაემატა. ჩვენს მომხმარებლებს მათი პორტფელის დივერსიფიცირება შევთავაზეთ და ამით პლატფორმას კიდევ ერთი საინვესტიციო ხელსაწყო დავამატეთ.

ინვესტირება Gen Z-შიც საკმაოდ პოპულარულია. ჩვენი მომხმარებლების 35-40% ზუსტად ახალგაზრდები არიან, რაც იმას ნიშნავს, რომ ახალ თაობაში ეს მიმართულება კიდევ უფრო საინტერესო და მასობრივი იქნება. გლობალური ტრენდიც ასეთია — საინვესტიციო მიმართულება ყველგან პოპულარულია. დიდი ბანკების გარდა, საცალო ვაჭრობის სეგმენტს ინვესტირების საშუალებას ფინტექებიც აძლევენ.

დაჯერების ძალა

ზოგადად, მგონია, რაღაცის თუ მჯერა, გამოვიყვან.

თავიდან არ მეგონა, ინვესტიციების პროდუქტი იქამდე თუ გაიზრდებოდა, სადამდეც დღეს ვართ მისულები. მჯეროდა, თუ საქმეში ძალიან დიდ შრომას ჩავდებდი და მოვინდომებდი, რომ ინვესტირება პოპულარული, დემოკრატიული და ძალიან მარტივი ყოფილიყო, ამას მართლა მივაღწევდი.

ბოლო სამი წლის განმავლობაში, რაც ამ პროდუქტზე ვმუშაობ, საქართველოში ყველაზე მარტივად ინვესტირება ჩვენთანაა შესაძლებელი და დარწმუნებული ვარ, ეს ზუსტად იმის გამო შევძელი, რომ დავიჯერე.

მჯეროდა, თუ საკმარისად ვიშრომებდი და ბოლომდე მოვინდომებდი, რომ პროდუქტი ძალიან მაგარი გამოსულიყო, ეს მართლა გამომივიდოდა. შესაძლებლობების დანახვის შემდეგ დავრწმუნდი, რომ მიზნების მიღწევას აუცილებლად შევძლებდი.

ამასთანავე, პროცესი ძალიან გლობალურია — ყველას შეუძლია მარტივად ჩაერთოს და ეს მეც ძალიან დიდ მოტივაციას მაძლევს.

რა მეამაყება

ვფიქრობ, მართლა დიდი ღირებულება მომაქვს იმით, რომ ხელმისაწვდომ და მარტივ პროდუქტს ვქმნი და ამას ყოველდღიურად ვგრძნობ.

წარმოიდგინეთ, ჯერ კიდევ 3 წლის წინ საქართველოში დაზოგვის რა ხელსაწყოებიც არსებობდა, მათგან ძირითადი საბანკო დეპოზიტი იყო, ან შეიძლება ვიღაცას სახლში შეენახა, ყულაბაში. ჩვენი დიდი შრომითა და ამ პროდუქტის შექმნით ინვესტირება ყველასთვის ხელმისაწვდომი გახდა. ეს ჩემთვისაც, როგორც მომხმარებლისთვის, დამატებითი ხელსაწყოა, რომ ფინანსები უკეთესად ვმართო.

ძალიან ამაყი ვარ, როცა ვხედავ, როგორ იყენებენ ჩვენს შექმნილ პროდუქტებს ადამიანები და თან ვიცი, თუ რამხელა შრომა და ზრუნვა დგას ამ ყველაფრის უკან. სამომხმარებლო გამოცდილების გაუმჯობესებისთვის, ეს მართლაც ღირებული პროდუქტია.

ასევე, დიდი სიამაყით მავსებს ის, თუ როგორ ვუწყობთ ხელს ბაზრის განვითარებას — საქართველოში სხვადასხვა ფასიან ქაღალდებზე ინტერესი გაჩნდა, რაც ამ მიმართულებით ქვეყნის განვითარების ნიშანიცაა. ამაშიც კარგად ჩანს ჩვენი გაწეული შრომა — პროდუქტის შექმნა, საცალო იქნება თუ მასობრივი, ერთია, განვითარება კი მეორე.

სარგებელი ყველას

ზოგადად, პროდუქტისა და ახალი მიმართულებების განვითარება ძალიან მაინტერესებს. ყველაზე მნიშვნელოვანია, ჩემი პროდუქტებით ვქმნიდე ღირებულებას და ჩვენს მომხმარებლებს რეალურად ვუმარტივებდე ცხოვრებას.

ჩემს თავსაც იქ ვხედავ, სადაც ამ მიზნის შესრულებას შევძლებ და თიბისი ზუსტად ამ პლატფორმას მაძლევს; ჩვენი ღირებულებები ერთმანეთს ემთხვევა და ეფექტიც სინერგიულია საერთო მიზნისკენ.

დღეს პროდუქტს ადგილობრივი ბაზრისთვის ვქმნი, თუმცა, სამომავლოდ მინდა, ჩემმა შექმნილმა პროდუქტმა საერთაშორისო ღირებულება შეიძინოს. მითუმეტეს, რომ თიბისიში შექმნილი ინოვაციები და პროდუქტები უკვე ფართოდაა აღიარებული ევროპისა თუ მსოფლიოს მასშტაბით.

სანამ დაიჯერებ

როცა თიბისიში სტაჟირებას ვიწყებდი, საერთოდ არ წარმომედგინა, რომ აქამდე მოვიდოდი.

პირველი ნაბიჯის გადადგმა ძალიან მნიშვნელოვანია — ბევრი უნდა იშრომო, დააკვირდე, ისწავლო და მერე მაგაზე დააშენო ყველაფერი. ვფიქრობ, ყოველთვის სჯობს რაღაც სცადო; შეიძლება შეცდომაც დაუშვა, მაგრამ იმას მაინც მიხვდები, მაგ საქმის გაკეთება გინდა თუ არა. მთავარია დაიჯერო, რომ მართლა შეგიძლია.