საქართველოს მეხუთე პრეზიდენტმა, სალომე ზურაბიშვილმა ფეისბუქ-ლაივში ქვეყანაში არსებულ პოლიტიკურ ვითარებასა და მომავალ არჩევნებზე ისაუბრა. პრეზიდენტის განცხადებით, ოპოზიციური სპექტრი და საზოგადოება ნებისმიერი სცენარისთვის მზად უნდა იყოს, რადგან რეჟიმი, შესაძლოა, იძულებული გახდეს, არჩევნები დანიშნოს.

ზურაბიშვილმა ხაზგასმით აღნიშნა, რომ ამჯერად ბოიკოტის ფორმატი მიუღებელია და მომავალი პროცესი ჩვეულებრივ საარჩევნო კამპანიას გასცდება.

"შეიძლება იძულებული გახდეს ეს რეჟიმი, რომ დანიშნოს არჩევნები. როდის იქნება, როგორ იქნება, ბევრჯერ მაქვს ნათქვამი — არ ვიცი, ვერ ვიტყვი, მაგრამ ერთი რამე ვიცი: ჩვენ უნდა ვიყოთ ამისთვის მზად. შინაგანად უნდა ვიყოთ მზად, რომ მერე არ დავიწყოთ იმაზე ფიქრი, რომ ბოიკოტი, თუ არა ბოიკოტი. არანაირი ბოიკოტი აღარ შეიძლება. იმიტომ, რომ სხვა გზა არ არსებობს. მაგრამ არჩევნები არის სხვადასხვა ფორმით. აქ არჩევნები აღარ უნდა იყოს ის არჩევნები, რაც გავიარეთ. ნდობით, რომ ჩვენ ვიქნებით დაცული, რომ არჩევნების ის ელექტრონული ფორმა იქნება დაცული. ყველაფერი არის გადასამოწმებელი. ყველაფერზე უნდა ვიბრძოლოთ — დაწყებული უცხოეთში ხმების დასაბრუნებლად. ყველაფერი იქნება ბრძოლა. ეს არ იქნება ჩვეულებრივი პარტიული არჩევნები. ეს იქნება ერთი დიდი ფრონტი, ერთი წინააღმდეგობის ბრძოლა დღევანდელ რეჟიმთან, რომელსაც დაერქმევა არჩევნები. ეს იქნება დღეს, ხვალ თუ 2028 წელს... მნიშვნელობა როგორ არ აქვს, მანამდე ხომ უნდა გავძლოთ, მაგრამ იმის მიუხედავად თუ როდის იქნება, ჩვენ უნდა მოვემზადოთ, ვემზადებით და უნდა ვიცოდეთ, რომ ეს დღე დადგება", — განაცხადა სალომე ზურაბიშვილმა.